Тұрғын үй кезегінде 970 мыңға жуық қазақстандық тұр

Отбасы банк тұрғын үйге кезекте тұрған қазақстандықтардың шашыраңқы тізімдерін «Тұрғын үймен қамтамасыз ету орталығы» бірыңғай ақпараттық жүйесінде біріктірді, деп хабарлайды Kapital.kz іскерлік ақпарат орталығының тілшісі банктің баспасөз қызметіне сілтеме жасап.

Бұған дейін кезекте тұрған азаматтардың есебін әкімдіктер жүргізіп келген. Онда жетім балалардан бастап әскери қызметкерлерге дейін әртүрлі санаттар бойынша бірнеше бөлек тізім болған. Кезекте тұрғандардың тізімдері Отбасы банкке берілгеннен кейін оларды түгендеу жұмыстары басталды.

Қазіргі таңда 408 565 кезек күтуші тексеруден өтті, тағы 49 011 адамның деректері қаралу үстінде. 74 005 азаматтың кезегі есепке қоюдың мән-жайы толық анықталғанға дейін уақытша тоқтатылды. Сонымен қатар 16 537 адам тұрғын үй кезегінен шығарылды, ал 75 456 адамға есепке қоюдан бас тартылды. Бас тартудың негізгі себептері – кезекте тұрған адамның немесе оның отбасы мүшелерінің меншігінде тұрғын үйдің болуы, сондай-ақ отбасы мүшелерінің бірінің де кезекте тұруы.

«Қазіргі уақытта кезекте 968 640 қазақстандық тұр. Олардың шамамен 30%-ы, яғни 306 632 адам, тұрғын үй алуда басым құқыққа ие. Бұл – тұрғын үй мәселесін өз бетінше шешуі қиын азаматтар санаты. Қазіргі кезде мемлекеттік қолдау шаралары дәл осы топқа бағытталған. 2025 жылдың қазан айынан бастап жергілікті әкімдіктер банкке 21 255 пәтер тапсырды. Оның ішінде 6 670 пәтер кезекте тұрғандарға жалға берілді, ал 2 343 пәтер 2% және 5% мөлшерлемемен жеңілдетілген несиелер арқылы сатып алуға рәсімделіп жатыр. Тұрғын үйді бөлу екі негізгі критерий бойынша жүргізіледі – кезекке қойылған күні және азаматтардың санаттарының басымдылығы», – деп түсіндірді банк.

Отбасы банктің қолдауымен 1996 жылдан бері «жетім балалар» санаты бойынша кезекте тұрған азамат қоныс тойын атап өтті. Сондай-ақ 2005 жылдан бері, яғни 20 жылдан астам уақыт кезек күткен азаматтар да баспанаға қол жеткізді. Олардың қатарында мүмкіндігі шектеулі жандар, көпбалалы және толық емес отбасылар, сондай-ақ ерекше қажеттілігі бар балаларды тәрбиелеп отырған отбасылар бар.

Алғаш рет «жесірлер» санаты бойынша кезекте тұрған 370 қазақстандыққа тұрғын үй берілді. «Жетім балалар» санатындағы азаматтар да белсенді түрде баспана алып жатыр: 986 адам қоныс тойын тойлады. Соңғы жарты жылда 1 077 мүмкіндігі шектеулі жан, 1 242 көпбалалы отбасы, 1 580 толық емес отбасы және ерекше қажеттілігі бар балаларды тәрбиелеп отырған 1 056 отбасы жаңа үйге ие болды.

Еске салайық, Азия даму банкі Отбасы банк үшін 90 млрд теңге көлеміндегі заемды мақұлдаған. Банктің басқарма төрайымы Ләззат Ибрагимова алдағы уақытта әйелдерге арналған «Ұмай» ипотекалық бағдарламасын қайта іске қосу жоспарланып отырғанын айтқан. 90 млрд теңгенің 50%-ы – «Жасыл ипотекаға», қалған бөлігі «Ұмай» бағдарламасына бағытталмақ.