• Басты бет
• Рейтингтер
• Fitch Ratings Ақтөбе облысына «BBB-» деңгейіндегі халықаралық кредиттік рейтинг берді

Fitch Ratings Ақтөбе облысына «BBB-» деңгейіндегі халықаралық кредиттік рейтинг берді

Бұл халықаралық инвестициялық деңгей өңірдің инфрақұрылымын дамытуға бюджеттен тыс ірі қаржы көздерін тартуға мүмкіндік береді

Fitch Ratings халықаралық рейтингтік агенттігі Ақтөбе облысына «BBB-» деңгейінде тұрақты болжаммен ұзақмерзімді халықаралық кредиттік рейтингін, сондай-ақ «AA+(kaz)» деңгейінде ұзақмерзімді ұлттық рейтингін берді, деп хабарлайды Kapital.kz іскерлік ақпарат орталығы өңірлік әкімдіктің баспасөз қызметіне сілтеме жасап.

«BBB-» рейтингі Fitch халықаралық шкаласы бойынша инвестициялық деңгейге сәйкес келеді және өңірдің қаржылық міндеттемелерін уақытылы әрі толық көлемде орындау қабілетін көрсетеді. Ал «AA+(kaz)» ұлттық рейтингі облыстың қазақстандық эмитенттер арасындағы жоғары кредиттік қабілеттілігін айғақтайды», делінген ақпаратта.

«Fitch халықаралық рейтингі – өңірдің қаржылық тұрақтылығына берілген тәуелсіз баға және Ақтөбе облысының экономикалық әлеуетіне деген сенімнің айқын көрінісі. Бұл біз үшін атқарылған жұмыстың нәтижесі ғана емес, сонымен қатар инвестиция тартуға, жаңа жобаларды іске асыруға және өңірдің бәсекеге қабілеттілігін одан әрі арттыруға қосымша мүмкіндік. Басты міндет – осы әлеуетті экономиканың тұрақты дамуы мен тұрғындардың өмір сүру сапасын жақсарту жолында тиімді пайдалану», – деді облыс әкімі Асхат Шахаров.

Сонымен қатар әкімдікте бүгінде өңір – Қазақстанның өнеркәсіптік, табиғи ресурстық және инвестициялық әлеуеті жоғары, еліміздің жетекші индустриялық орталықтарының бірі екенін атап өтті. Экономиканың әртараптандырылған құрылымы мен ірі инвестициялық жобалардың іске асырылуы өңірдің одан әрі тұрақты әлеуметтік-экономикалық дамуына берік негіз қалыптастыруда.

Халықаралық кредиттік рейтингтің болуы өңір инфрақұрылымын дамыту үшін бюджеттен тыс қаржыландыру көздерін тарту мүмкіндігін кеңейтеді, деді әкімдікте.

Болашақта бұл жаңа жұмыс орындарын ашу, кәсіпкерлікті дамыту, коммуналдық инфрақұрылымды жаңғырту, сондай-ақ әлеуметтік маңызы бар нысандарды салу мен қайта жаңғыртуға оң ықпал етуі мүмкін.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз