- Басты бет
- Тағайындаулар
- KASE-нің экс-басшысы Алина Алдамберген жаңа қызметке тағайындалды
KASE-нің экс-басшысы Алина Алдамберген жаңа қызметке тағайындалды
Ол Маскат қор биржасында бизнесті дамыту жөніндегі директор болды
Қазақстан қор биржасының (KASE) экс-басшысы Алина Алдамберген Оман Корольдігіндегі Маскат қор биржасында бизнесті дамыту жөніндегі директор қызметіне тағайындалды. Бұл туралы ол LinkedIn парақшасында жазды, деп хабарлайды Kapital.kz іскерлік ақпарат орталығының тілшісі.
«Мен үшін Muscat Stock Exchange S.A.O.C.-та CBO (Chief Business Officer – ред.) лауазымына дейін көтерілу үлкен мәртебе. Біз мықты командамыздың мүшелерімен бірге дамушы қор нарығына қарай жолымызды жалғастырып, жаңа инвесторларды тартып, жаңа өнімдерді іске қосатын боламыз. Мұнда, MSX-та біз бес жылдық стратегиямызды аяқтап, жаңасын әзірлеп жатырмыз... Маскаттың капитал нарықтарын одан әрі жақсартайық!» – деп жазды Алина Алдамберген LinkedIn-де.
2025 жылғы наурызда Алина Алдамберген KASE басқарма төрағасы лауазымынан өз бастамасымен мерзімінен бұрын босады. Ол биржаны тоғыз жыл бойы басқарған болатын. Биылғы жылдың 31 наурызында KASE-ні Орталық депозитарийдің бағалы қағаздар жөніндегі басқарма төрағасы болған Әділ Мухамеджанов басқарды.
Алина Алдамберген 1973 жылы туған. 1995 жылы Қазақ мемлекеттік басқару академиясын «Қаржы және несие» мамандығы бойынша бітірген; 1994-1995 жылдары – АҚШ-тың Сиэтл қаласындағы Вашингтон университетінің Бизнес әкімшілендіру мектебінде «Қаржы және халықаралық экономика» бағдарламасы бойынша оқыған; 1996-1997 жылдары – АҚШ-тың Рочестер қаласындағы Уильям Е. Саймон атындағы Бизнес әкімшілендіру мектебінде MBA дәрежесін, «Корпоративтік қаржы және бухгалтерлік есеп» мамандығы бойынша алған.
1997-2001 жылдары – «ABN AMRO Bank Kazakhstan» ЖАҚ-да қаржылық талдаушы, менеджер, бас маман, құрылымдық қаржыландыру басқармасы бастығының орынбасары, кредиттік талдау және құрылымдау басқармасы бастығының орынбасары;
2001-2003 жылдары – ABN AMRO Bank N.V. (Лондон, Ұлыбритания) жаһандық қаржы нарықтары бөлімінде рейтингтік кеңесші;
2003-2005 жылдары – «ABN AMRO Asset Management» ААҚ басқарма төрайымы, директорлар кеңесінің мүшесі;
2005-2006 жылдары – «ABN AMRO Bank Kazakhstan» ЖАҚ басқарма төрағасының орынбасары, «Глобалдық нарықтар» және «ЦВЕБВ елдері үшін қарыздық қаржыландыруды ұйымдастыруды басқару» бөлімшесінің басшысы;
2006-2007 жылдары – Қазақстан Республикасының Алматы қаласындағы Өңірлік қаржы орталығы қызметін реттеу агенттігі төрағасының орынбасары;
2008-2011 жылдары – Қазақстан Республикасының қаржы нарығы мен қаржы ұйымдарын реттеу және қадағалау агенттігі төрағасының орынбасары;
2011-2013 жылдары – «Самұрық-Қазына Финанс» ЖШС бас директоры (орынбасары);
2013-2016 жылдары – «Бәйтерек» ұлттық басқарушы холдингі АҚ басқарма төрағасының орынбасары;
2016 жылғы ақпаннан 2025 жылғы наурызға дейін – Қазақстан қор биржасының басқарма төрайымы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
