• Басты бет
• Мемлекет
• Қазақстандықтарға онлайн жеткізу қызметіне қатысты алаяқтықтың жаңа тәсілі туралы ескерту жасалды

Қазақстандықтарға онлайн жеткізу қызметіне қатысты алаяқтықтың жаңа тәсілі туралы ескерту жасалды

Алаяқтар маркетплейс курьері ретінде хабарласып, SMS-кодты айтып беруді сұрайды

Қазақстанда интернет-дүкендердің танымалдығы артқан сайын онлайн жеткізу қызметіне қатысты алаяқтық деректері де көбейіп келеді. Бас прокуратура азаматтарды сақ болуға шақырып, қаскөйлердің жеткізу қызметінің қызметкері ретінде хабарласып, тапсырысты растау немесе одан бас тарту үшін SMS-кодты айтуды талап ететінін ескертті. Тіпті мұндай тапсырысты азамат мүлде рәсімдемеген болуы мүмкін, деп хабарлайды Kapital.kz іскерлік ақпарат орталығы Бас прокуратураның Қылмыстық қауіптер мен тәуекелдерді болжау орталығының баспасөз қызметіне сілтеме жасап.

«Алаяқтар азаматтарға курьер, жеткізу қызметінің немесе интернет-дүкендер мен танымал маркетплейстердің қызметкері ретінде қоңырау шалып, олардың атына тауар жеткізу рәсімделгенін хабарлайды. Сенім ұялату үшін клиенттің жеке деректерін атауы мүмкін. Кейін олар тапсырысты алу, жеткізуді растау немесе маркетплейс жүйесінде тапсырыстан бас тарту үшін SMS арқылы келген кодты айтуды сұрайды. Егер азамат ешқандай жеткізуді күтпейтінін немесе онлайн сатып алу жасамағанын айтса, алаяқтар психологиялық қысым көрсетіп, тауар қоймада ақылы сақталатынын, тапсырыстан бас тартқаны үшін айыппұл салынатынын немесе жеткізуді шұғыл түрде тоқтату қажет екенін алға тартады», – делінген ақпаратта.

Ведомствоның мәліметінше, SMS-кодты айтқан азамат өз аккаунттарын басқару мүмкіндігін алаяқтардың қолына береді. Кейін қаскөйлер оның ақшасын ұрлап қана қоймай, онлайн несие де рәсімдеуі мүмкін.

Бас прокуратура маркетплейстердің, жеткізу қызметтерінің және банктердің қызметкерлері телефон арқылы ешқашан SMS-кодты сұрамайтынын, оның ішінде тауар жеткізуді растау үшін де мұндай ақпарат талап етілмейтінін еске салды.

CEOWORLD онлайн сервисінің дерегіне сәйкес, 2025 жылдың қорытындысы бойынша Қазақстан ТМД елдері арасында онлайн сауда көлемі бойынша көшбасшылардың қатарына енді. Ел тұрғындарының электронды платформалар арқылы жасаған сатып алуларының үлесі 32%-ды құрады.

Бұған дейін Ішкі істер министрлігі жыл басынан бері интернет-алаяқтық қылмыстарының саны 7%-ға азайғанын хабарлаған болатын. Зардап шеккен азаматтарға 4,8 млрд теңге қайтарылды. Ұлттық банкпен бірлесіп 2,6 млрд теңгенің заңсыз шығарылуына жол берілмей, 150 миллионнан астам алаяқтық қоңырау бұғатталды.

Сондай-ақ Шымкентте интернет-алаяқтықпен айналысқан ұйымдасқан қылмыстық топтың қызметі тоқтатылды. Олар мессенджерлер арқылы азаматтарға туыстары немесе достарының атынан шұғыл ақша аударуды сұрап хабарламалар жіберген. Бұдан бөлек, Бас прокуратураның Қылмыстық қауіптер мен тәуекелдерді болжау орталығы Apple ID иелерін алдаудың жаңа қауіпті тәсілін де анықтады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз