• Басты бет
• Мемлекет
• Қазақстанда жанар-жағармайды заңсыз алып шығудың 700-ден астам әрекетіне тосқауыл қойылды

Қазақстанда жанар-жағармайды заңсыз алып шығудың 700-ден астам әрекетіне тосқауыл қойылды

Отынды шетелге заңсыз тасымалдаудың алты арнасы жойылды

Энергетикалық қауіпсіздікті қамтамасыз ету және жанар-жағармай материалдарының ішкі нарығын қорғау мақсатында Қазақстанда отынды ел аумағынан заңсыз алып шығудың жолын кесу жұмыстары жалғасып жатыр. Энергетика министрлігінің ЖЖМ экспорттауға енгізген мораторийі күшінде болған кезеңде отынды шетелге заңсыз тасымалдаудың 6 арнасы жойылып, 1,5 мың тоннадан астам жанар-жағармай тәркіленді, деп хабарлайды Үкіметтің баспасөз қызметі.

Жыл басынан бері барлығы 8 қылмыстық іс тіркелді. Оның ішінде есепке алынбаған 28,5 мың тонна мұнайды заңсыз өңдеу және көлеңкелі айналымы 37,2 млрд теңгеден асатын 190 мың тоннадан астам бензинді контрабандалық жолмен алып шығу фактілері бар.

ІІМ тарапынан қайта жабдықталған көлік құралдарын пайдалана отырып, отынды алып шығу схемалары анықталып, олардың жолы кесілуде. Сондай-ақ отын тасымалдау үшін қосымша бактар орнатылуы мүмкін техникалық қызмет көрсету станциялары (ТҚКС) тексеріліп жатыр. Мысалы, тек Жамбыл облысында сәуірдің аяғынан маусымның ортасына дейін қосымша отын бактары мен газ баллон жабдықтарын заңсыз орнатудың 73 жағдайы тіркелді.

Жамбыл облысының Қордай ауылында 16 ТҚКС тексеріліп, нәтижесінде 6 иесіне қатысты тиісті шаралар қолданылды.

Қаржылық мониторинг агенттігі мұнай өңдеу өнімдерін экспорттау кезінде жалған құжаттарды анықтау шараларын жүргізіп жатыр. Жыл басынан бері мұнай өнімдерінен сынама ала отырып 57 іс-шара, сондай-ақ мұнай өңдеу нысандарының қызметіне тексерулер жүргізілді.

Жалпы, ағымдағы жылдың басынан бері «Переток» ведомствоаралық операциясы аясында Қаржылық мониторинг агенттігі Ішкі істер министрлігімен және ҚР ҰҚК Шекара қызметімен бірлесіп, автокөлік өткізу пункттерінде ЖЖМ алып шығудың 712 әрекетіне тосқауыл қойды.

Қабылданып жатқан шаралар мұнай өнімдерінің тапшылығын болдырмауға және ішкі нарықтағы тұтынушыларды тұрақты түрде қамтамасыз етуге бағытталған. Құзырлы органдар бұл бағыттағы жұмысты жалғастыруда.

Еске сала кетейік, бұған дейін Премьер-Министр Олжас Бектенов шекарадағы бақылауды күшейтуді және отын тапшылығына жол бермеу әрі ел қажеттілігін толықтай қамтамасыз ету үшін барлық шараларды қабылдауды тапсырған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз