Шымкентте интернет-алаяқтар тобы әшкереленді
Полиция қазақстандықтарды мессенджер арқылы келетін «шұғыл ақша аудару» туралы өтініштерді мұқият тексеруге шақырады
Шымкентте интернет-алаяқтықпен айналысқан ұйымдасқан топтың әрекетіне тосқауыл қойылды. Қылмыстық топ азаматтардың мессенджерлеріне туыстары немесе достарының атынан шұғыл ақша сұрап хабарлама жіберіп отырған, деп хабарлайды Kapital.kz іскерлік ақпарат орталығы Ішкі істер министрлігінің баспасөз қызметіне сілтеме жасап.
«Шымкент қаласы полиция департаменті киберқылмысқа қарсы күрес басқармасының қызметкерлері интернет-алаяқтықпен айналысқан ұйымдасқан топтың қызметін тоқтатты. Қаскөйлер WhatsApp мессенджерінде кең таралған алдау әдісін қолданған. Олар азаматтармен байланысқа шығып, өздерін туысы, досы немесе жақын танысы ретінде таныстырған және түрлі сылтаулармен тез арада ақша аударуды өтінген. Алаяқтардың арбауына түскенін сезбеген жәбірленушілер көрсетілген шоттарға қаражат аударып жіберген», — делінген ІІМ ақпаратында.
Зардап шеккендердің бірі — жергілікті тұрғын. Ол досының атынан шұғыл қаржылай көмек сұраған хабарлама алғаннан кейін полицияға жүгінген. Танысымен сөйлесіп отырғанына сенімді болған ер адам көрсетілген шотқа 3,5 миллион теңге аударған.
Жедел-іздестіру іс-шараларының нәтижесінде полицейлер алты күдіктіні анықтады. Күдіктілер жалдаған пәтерді тінту барысында қылмысқа пайдаланылған 19 SIM-карта, 11 телефон және планшет тәркіленді. Қазіргі уақытта олардың Астана мен Шымкент қалаларында жасалған екі алаяқтық дерегіне қатысы бар екені дәлелденді. Келтірілген жалпы шығын көлемі 7,5 миллион теңгеге жетті. Тәртіп сақшылары олардың осыған ұқсас басқа да қылмыстарға қатыстылығын тексеріп жатыр.
Қазіргі уақытта үш күдікті уақытша ұстау изоляторына қамалды. Сотқа дейінгі тергеу амалдары жүргізілуде.
Полиция азаматтарды қырағы болуға шақырады. Шұғыл ақша аудару туралы хабарлама алған жағдайда, міндетті түрде туысыңызға немесе танысыңызға телефон соғып, бұл өтініштің шынымен де солардан келгеніне көз жеткізу қажет. Ақпаратты осылайша қайта тексеру үлкен қаржылық шығындардың алдын алуға көмектеседі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
