Алматы жүргізушілерінің жартысынан астамы бір жыл бойы ереже бұзбаған
Sergek мегаполистегі ең ұқыпты жүргізушілерді анықтады
Алматыда бір жыл бойы жол қозғалысы ережелерін бұзбай, көлік ұқыпты басқаратын жүргізушілер марапатталды. Sergek ITS интеллектуалды көлік жүйесінің деректеріне сәйкес, жүргізушілердің 55,6%-ы көрсетілген кезеңде бірде-бір рет жол қозғалысы ережесін бұзбаған, деп хабарлайды Kapital.kz іскерлік ақпарат орталығы компанияның баспасөз қызметіне сілтеме жасап,
Зерттеу барысында жүргізушілердің Алматыдағы ғана емес, Қазақстанның барлық өңірлеріндегі тәртібі ескерілген. Егер жүргізуші Алматыда жол ережесін сақтағанымен, басқа қалада құқық бұзушылық жасаған болса, ол тәртіпті жүргізушілер қатарына енгізілген жоқ.
Акция аясында жол қозғалысы ережелерін мүлтіксіз сақтап қана қоймай, ең көп қашықтық жүріп өткен жүргізушілер марапатталды. Жеңімпаздарға бір жылдық КАСКО сақтандыру полисіне сертификаттар табысталды.
Sergek Group компаниясының бас директоры Евгений Ким жауапты әрі қауіпсіз жүргізу мәдениеті тек бақылауды ғана емес, қолдауды да қажет ететінін атап өтті.
«Біз қауіпсіз әрі жауапты жүргізушілерді қолдауды маңызды деп санаймыз. Мұндай тәжірибе көптеген елдерде бұрыннан бар. Сондықтан жол қозғалысы ережелерін бұзбай, ондаған мың шақырым жол жүрген жүргізушілерді арнайы атап өтуді жөн көрдік. Осы мақсатта Sergek ITS жүйесі арқылы 3 миллионнан астам бірегей көлік құралы қамтылған талдау жүргіздік», деді ол.
Зерттеу 2025 жылғы 1 маусым мен 2026 жылғы 1 маусым аралығында Алматы көшелерінде жүрген көліктерді қамтыған. Олардың қатарында Алматыда тіркелген көліктер ғана емес, еліміздің басқа өңірлерінен келген және шетелдік нөмірлі транзиттік көліктер де болды. Нәтижесінде Алматы мен өзге өңірлерінде де жол қозғалысы ережелерін бұзу дерегі тіркелмеген 1,7 миллионнан астам жүргізуші анықталған.
Алматы қаласы Полиция департаментінің мәліметінше, қалада 750 мыңға жуық автокөлік тіркелген. Ал арнайы талдау нәтижесі күн сайын қала жолдарымен қосымша 350–400 мыңға дейін өзге өңірлерден келген көлік қатынайтынын көрсетеді.
Айта кетейік, Қазақстанда бұл бастаманы ҚР Ішкі істер министрлігі, Sergek Group және «Freedom Insurance» АҚ қатарынан екінші жыл жүзеге асырып келеді. Бұған дейін осындай марапаттар Астана, Алматы, Шымкент, Атырау, Тараз және Семей қалаларының жүргізушілеріне табысталды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
