Азат Перуашев өкілеттігін тоқтатуына қатысты пікір білдірді
Саясаткер бұл шешімі бәсекелестерін таңғалдырды деп есептейді
«Ақ жол» партиясының парламенттік фракция жетекшісі, Мәжіліс депутаты Азат Перуашев партия төрағасы қызметінен кету туралы шешіміне қатысты түсініктеме берді. Оның айтуынша, бұл саналы түрде жасалған қадам және саяси оппоненттер үшін күтпеген жайт болуы тиіс еді, деп хабарлайды Kapital.kz іскерлік ақпарат орталығының тілшісі.
«Дегенмен таңғалдыра алдым ғой, иә? Саясаткер үшін күтпеген шешімдер қабылдап, бәсекелестерін тығырыққа тіреу – жақсы қасиет. Бұл тосын қадамның сәтті шыққанына ризамын. Саясатта, әсіресе белгісіздік орнаған сәтте айналаңды таңғалдыра білу – маңызды қасиет», - деді Азат Перуашев Мәжілістің жалпы отырысынан кейінгі кулуарда
Азат Перуашев осы жылдың тамыз айына жоспарланған жаңа бірпалаталы парламент сайлауына қатысу-қатыспауына байланысты әлі нақты шешім қабылдамағанын айтты. Журналистердің сұрақтарына жауап бере келе, ол өзінің саяси болашағын талқылауға дайын екенін және егер партияластары қолдау білдірсе, өкілетті билік органындағы жұмысын жалғастыруы мүмкін екенін атап өтті.
«Мен депутат, саясаткер ретінде өзімді көрсете алдым. Егер әріптестерім менің тәжірибемді, көзқарасым мен ұстанымдарымды қажет деп тапса, мен мұны талқылауға дайынмын», - деп түйіндеді сөзін ол.
Еске сала кетейік, 2026 жылдың 13 маусымында «Ақ жол» партиясының төрағасы Азат Перуашев қызметінен кеткен болатын. Саяси бірлестіктің басшысы болып Мәжіліс вице-спикері Дания Еспаева сайланды. Сондай-ақ Amanat партиясының депутаттары Әділет партиясымен бірігу бастамасын қолдағаны белгілі болды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
