Мегаполис тұрғындары суды үнемдей бастады
Қазақстанда бір адамға шаққандағы су тұтыну көлемі қысқарды
Республикалық маңызы бар қалаларда халық санының өсуіне қарамастан, бір адамға шаққандағы орташа су тұтыну көлемі азайды, деп хабарлайды Kapital.kz іскерлік ақпарат орталығы Су ресурстары және ирригация министрлігіне сілтеме жасап.
Ведомство мәліметінше, 2024 жылы Астана тұрғыны жылына орта есеппен 70,9 текше метр су тұтынса, 2025 жылы бұл көрсеткіш 67,8 текше метрге дейін төмендеді. Алматыда бір адамға шаққандағы су тұтыну көлемі жылына 73,3 текше метрден 69,1 текше метрге дейін қысқарды. Ал Шымкентте бұл көрсеткіш 63,7 текше метрден 62,5 текше метрге дейін төмендеген.
«Су тұтыну көлемінің азаюы су ресурстарына ұқыпты қарау мәдениетінің біртіндеп қалыптасып келе жатқанын және азаматтардың суды үнемдеудің маңызы жайлы хабардарлығының артқанын көрсетеді. Бұған Су ресурстары және ирригация министрлігі жүргізіп жатқан кешенді ақпараттық-түсіндіру жұмыстары ықпал етіп жатыр», делінген министрлік ақпаратында.
Бұл ретте министрлік қоғамда суды үнемдеу мәдениетін қалыптастыру мақсатында тұрмыстық жағдайда суды үнемдеу жөніндегі әдістемелік ұсынымдар әзірледі. Осы ұсынымдар қамтылған ақпараттық материалдар 145 нысанда орналастырылды. Сонымен қатар балалар мен жастар арасында су ресурстарына ұқыпты көзқарас қалыптастыруға бағытталған «Суды үнемде - болашақты сақта» атты ауқымды жоба іске асырылып жатыр.
«Бұл жұмыс міндетті түрде жалғасады. Жыл соңына дейін бірқатар жаңа бастаманы жүзеге асыру жоспарланып отыр. Олардың қатарында педагогтерге арналған әдістемелік ресурсты әзірлеу және суды үнемдеу мәселелеріне арналған ата-аналардың республикалық форумын өткізу бар», - деп атап өтті Су ресурстары және ирригация вице-министрі Талғат Момышев.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
