• Басты бет
• Мемлекет
• Депутат ҮЕҰ-ға берілетін шетелдік гранттар туралы мәліметтерді толықтай ашық етуді ұсынды

Депутат ҮЕҰ-ға берілетін шетелдік гранттар туралы мәліметтерді толықтай ашық етуді ұсынды

Ол жобалар, мердігерлер мен түпкілікті бенефициарлар туралы мәліметтер тек тиісті органдарға ғана емес, жұртшылыққа да қолжетімді болуы тиіс, деп есептейді

Мәжіліс депутаты Магеррам Магеррамов Қазақстанда шетелдік қаржыландырудың ашықтығын күшейту қажет деп есептейді. Оның пікірінше, ақпаратты жариялаудың қазіргі тетігін жетілдіру керек. Яғни, қаражаттың қандай жобаларға бағытталып жатқаны, оларды іске асыруға кімдердің қатысатыны және ақшаның түпкілікті алушысы кім екені туралы мәліметтер де қамтылуы тиіс, деп хабарлайды Kapital.kz іскерлік ақпарат орталығының тілшісі.

Мәжілістің жалпы отырысында сөз сөйлеген депутат наурыз айында Мемлекеттік кірістер комитеті алғаш рет шетелдік қаржыландыруды алушылар туралы, соның ішінде келіп түскен қаражат көлемі мен олардың көздерін қамтитын кеңейтілген мәліметтерді жариялағанын еске салды. Оның айтуынша, тек 2025 жылдың екінші жартыжылдығында ғана Қазақстанға шетелден 12 миллиард теңгеден астам қаражат түскен.

«Аталған қаражаттың қомақты бөлігі өздерін құқық қорғау, медиа және сарапшылық ұйымдар ретінде танытып, қоғамдық-саяси күн тәртібін қалыптастыруға жүйелі түрде қатысып жүрген құрылымдарға бағытталған. Қазіргі жағдайда бұл қоғамдық пікірге, сарапшылық бағалауларға және ішкі ақпараттық ортаға тікелей әсер ететін салаларға жүйелі түрде қаржылай ықпал етуді білдіреді», — деді Магеррам Магеррамов.

Оның пайымдауынша, қазіргі тізілім қаржыландыру туралы тек жалпы мәліметтерді ғана көрсеткендіктен, бұл ақшаның елде қалай пайдаланылып жатқаны жайлы толық мағлұмат бере алмайды. Ол ашық деректерде қаржыландыру мақсаттары, нақты бағдарламалар және қаражаттың ары қарай қалай жұмсалатыны туралы ақпараттың жоқтығын атап өтті.

«Шетелдік қаржыландырудың ашықтығы мәселесі қаржылық реттеу шеңберінен шығып, Қазақстан Республикасының ұлттық қауіпсіздігі мен ақпараттық егемендігін қамтамасыз етуде тікелей маңызға ие болып отыр. Тізілімде тек негізгі көрсеткіштер — сомалар мен қаражатты алғашқы алушылар ғана көрсетілген. Бұл ретте қоғам мен мемлекеттік институттар бұл ақшаның нақты қандай жобаларға бағытталып жатқанын, мердігер мен түпкілікті орындаушының кім екенін, сондай-ақ мұндай жобалардың қоғамдық пікір мен елдің ішкі тыныс-тіршілігіне қандай ықпал ететінін көре алмайды», — деп мәлімдеді депутат.

Ол шетелден қаржы алатын ұйымдарды іске асырылып жатқан жобалар мен бағдарламалар, мердігерлер мен қосалқы мердігерлер, түпкілікті бенефициарлар, сондай-ақ мұндай бастамалардың қорытындылары туралы мәліметтерді жариялауға міндеттеуді ұсынды. Ол өз ұсынысы үкіметтік емес ұйымдардың қызметін шектеуді немесе тыйым салуды көздемейтінін, тек шетелдік қаражаттың жұмсалу ашықтығын арттыруды ғана мақсат ететінін қадап айтты.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз