• Басты бет
• Мемлекет
• Мәжіліс ҰҚШҰ аумағында әскери құрылымдардың уақытша орналасу рәсімдерін жеңілдетуді қолдады

Мәжіліс ҰҚШҰ аумағында әскери құрылымдардың уақытша орналасу рәсімдерін жеңілдетуді қолдады

Өзгерістер ұйымға мүше елдерде әскери құрылымдардың уақытша орналасуын реттеуді көздейді

Мәжіліс депутаттары Ұжымдық қауіпсіздік туралы шарт ұйымына (ҰҚШҰ) мүше мемлекеттердің аумағында әскери құрылымдардың уақытша орналасу тетіктерін жеңілдетуге бағытталған хаттаманы ратификациялады. Құжат сонымен қатар ұйымға мүше елдердің шекарасы арқылы жеке құрамды, техника мен әскери мүлікті тасымалдау рәсімдерін жеделдетуді қарастырады, деп хабарлайды Kapital.kz іскерлік ақпарат орталығының тілшісі.

Хаттамаға 2024 жылғы 28 қарашада Қазақстан, Беларусь, Қырғызстан, Ресей және Тәжікстан басшылары қол қойған болатын. Құжат ұжымдық қауіпсіздік күштері мен құралдарының қызметін реттейтін ҰҚШҰ-ның қолданыстағы келісімдеріне өзгерістер енгізеді.

Ережелерді жаңарту қажеттілігі қатысушы елдердің ықтимал дағдарыстық жағдайларға жедел әрекет ету үшін құқықтық тетіктерді алдын ала дайындауға ұмтылысымен түсіндіріледі. Мұндай жағдайларда бөлімшелерді жылдам өрістету, техниканы тасымалдау және ұйымға мүше мемлекеттердің бірінің аумағында бірлескен іс-қимылдарды ұйымдастыру талап етілуі мүмкін.

Палата отырысында хаттаманың негізгі ережелері туралы депутат Асхат Рахымжанов баяндап берді. Оның сөзінше, өзгерістер әскери саладағы мемлекеттердің өзара іс-қимыл тәртібін айқындайтын екі негізгі құжатқа қатысты болып отыр.

«Бірінші құжат — ұжымдық қауіпсіздік жүйесінің күштері мен құралдары құрылымдарының мәртебесі туралы 2010 жылғы келісімге өзгерістер енгізу туралы хаттама. Оның мақсаты — бюрократиялық кедергілерді жою және әскери құрылымдардың уақытша орналасуы мен оларды басқаруды жүзеге асыруды нақты реттеу», — деді ол.

Бұл ретте бөлімшелерді одақтас мемлекеттердің аумағында орналастыру мәселелерін егжей-тегжейлі реттеу, сондай-ақ осындай құрылымдар өз елінен тыс жерде болған кезеңде өкілеттіктердің аражігін ажырату және басқару тәртібі туралы сөз болып отыр.

Екінші құжат әскери қызметшілерді, қару-жарақты, техниканы, мүлікті және әскери мақсаттағы өнімдерді ҰҚШҰ-ға мүше мемлекеттердің аумақтары арқылы тасымалдау тәртібіне қатысты. Өзгерістер күшіне енгеннен кейін келісу рәсімдері жеңілдеп, уақыт едәуір үнемделеді деп күтілуде.

Осылайша, ұйымға мүше елдер бірлескен іс-қимылдардың жеделдігін арттыруды және қауіпсіздік саласындағы ұжымдық іс-шараларды өткізу кезінде, соның ішінде төтенше жағдайлар немесе өзге де сын-қатерлер туындағанда күштер мен құралдарды ықтимал өрістету кезінде әкімшілік кедергілерді азайтуды көздеп отыр.

Бұған дейін Қазақстанның ҰҚШҰ ұжымдық қауіпсіздік жүйесіне қатысуының құқықтық тетіктері кеңейтілетіні хабарланған болатын.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз