Қазақстаннан Иранға азық-түлік экспорты 97%-ға өсті
Екі ел арасындағы сауда 342 млн долларға жетті
Былтыр Қазақстан мен Иран арасындағы Өткен жылдың қорытындысы бойынша аталған салада екі елдің тауар айналымы 55,8%-ға өсіп, 342 млн АҚШ долларына жетті, деп хабарлайды Kapital.kz іскерлік ақпарат орталығы Ауыл шаршуалығы министрлігіне сілтеме жасап.
Ауыл шаруашылығы министрі Айдарбек Сапаров Иран Ислам Республикасының Өнеркәсіп, кен өндіру және сауда министрі Сейед Мохаммад Атабакпен кездесіп, тараптар агроөнеркәсіптік кешен саласындағы екіжақты ынтымақтастықты кеңейту, өзара сауда және инвестициялық әріптестікті нығайту мәселелерін талқылады.
«Қазақстан Иранмен аграрлық саладағы ынтымақтастықты тереңдетуге ерекше мән береді. Біздің өнімдеріміз бірін-бірі толықтырып отырады, оған жыл сайынғы тұрақты өсім нақты дәлел», – деді Айдарбек Сапаров.
Ведомство мәліметінше, былтыр екі елдің ауыл шаруашылығы саласындағы тауар айналымы 55,8%-ға өсіп, 342 млн АҚШ долларына жеткен. Бұл екіжақты сауданың жалпы көлемінің 79%-ын құрады. Қазақстандық ауыл шаруашылығы өнімдерінің экспорты 97%-ға артып, 238,5 млн АҚШ долларын құрады. Сонымен қатар, астық жеткізу көлемі екі еседен астам ұлғайып, 1,1 млн тоннаға жетіп, 225,3 млн АҚШ долларын құрады.
Осыған байланысты кездесу барысында Иранға астық экспортын ұлғайту, халықаралық ветеринариялық және халал стандарттарына сәйкес келетін сиыр және қой етін жеткізу көлемін арттыру мәселелеріне ерекше назар аударылды. Сондай-ақ Иран нарығына өсімдік майлары мен басқа да азық-түлік өнімдерін жеткізу әлеуеті зор екені айтылды.
Сейед Мохаммад Атабак Иранның Қазақстанмен сауда-экономикалық ықпалдастықты күшейтуге мүдделі екенін жеткізді.
«Қазақстан – Иранның өңірдегі маңызды серіктестерінің бірі. Біз өзара тауар айналымын одан әрі арттыруға, ауыл шаруашылығы өнімдерінің тасымалын кеңейтуге, логистикалық бағыттарды дамытуға, сондай-ақ өңдеу өнеркәсібі мен агроөнеркәсіптік кооперация саласындағы бірлескен жобаларды жүзеге асыруға қызығушылығымыз зор», – деді Иранның Өнеркәсіп, кен өндіру және сауда министрі.
Кездесуде инвестициялық ынтымақтастық та назардан тыс қалмады. Айдарбек Сапаров ирандық инвесторларды ауыл шаруашылығы өнімдерін өндіру және терең өңдеу саласында, атап айтқанда, астық және майлы дақылдарды өңдеу бағытындағы жобаларға қатысуға ұсыныс білдірді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
