- Басты бет
- Экономика
- Қазақстанда жылдық инфляция 10,4%-ға жетті: Отандық көліктер арзандап, қонақүйлер қымбаттады
Қазақстанда жылдық инфляция 10,4%-ға жетті: Отандық көліктер арзандап, қонақүйлер қымбаттады
Қазақстандағы қымбатшылық пен баға динамикасы жаңа деңгейге шықты
Ресми мәліметтерге сәйкес, 2026 жылғы мамыр айында жылдық инфляция деңгейі 10,4%-ды құрады. Ал бір айдың ішіндегі (сәуірмен салыстырғанда) инфляцияның айлық көрсеткіші 0,7%-ға өскен, деп хабарлайды Kapital.kz іскерлік ақпарат орталығы Ұлттық статистка бюросына сілтеме жасап.
Ұлттық статистика бюросының дерегінше, жылдық есепте азық-түлікке жатпайтын тауарлар 11,7%-ға, азық-түлік өнімдері 10,7%-ға, ал халыққа көрсетілетін ақылы қызметтер 8,7%-ға артқан.
Төменде мамыр айында қалтаны қаққан және керісінше, айтарлықтай арзандаған тауарлар мен қызметтердің толық тізімін ұсынамыз.
Не қымбаттады?
Азық-түлік және күнделікті тұтынатын тауарлар нарығында бағаның өсуі байқалады. Әсіресе, ет өнімдері мен тұрмыстық химия бағасы жоғарылаған. Атап айтқанда азық-түлік өнімдерінен қой еті – 4,7%-ға, сиыр бауыры мен майдағы шпроттар – 3,3%-ға, алма – 3,1%-ға, шұжық өнімдері – 1,7%-ға, сүт және айран – 0,4%-дан 1,1%-ға дейін және жұмыртқа – 0,6%-ға қымбаттады.
Жылдық есептегі ең үлкен өсім бірқатар өнім бойынша байқалды. Мәселен, 2025 жылдың мамырымен салыстырғанда шаруашылық сабыны 10,5%-ға, ерлер шалбары 10,2%-ға, кір жуғыш ұнтақ пен тұрмыстық техникалар бағасы 9,1%-ға өскен. Жылдық деңгейде алма (9,8%), мұздатылған балық (8,5%) және қара шай (7,6%) бағасы да бір орнында тұрған жоқ.
Не арзандады?
Инфляцияның өсуіне қарамастан, нарықта айтарлықтай арзандаған тауарлар да бар. Ең үлкен тосынсый — автокөлік нарығында тіркелді. Отандық жеңіл автокөліктер – өткен жылдың мамыр айымен салыстырғанда бағасы 17,9%-ға төмендеген.
Көкөністерден қияр мен қызанақ – маусымдық факторға байланысты бір айда 25%-дан астамға арзандады (жылдық есепте 35%-ға дейін төмендеу бар);
Сонымен қатар смартфондар – 1,5%-ға арзандаса, азитромицин (дәрі-дәрмек) – жылдық есепте 6%-ға төмендеген. Ттаба (4,8%) мен ыдыс жуғыш машиналар (3,3%) да арзандаған тауарлар қатарында.
Қызмет көрсету саласында баға қалай?
Ұлттық статистика бюросы мамыр айында ақылы қызметтердің бағасы айтарлықтай өскенін айтады (бір айда 1,1%-ға). Демалыс маусымының басталуы бұл салаға тікелей әсер еткен. Атап айтқанда балалар аттракциондары – 6,6%-ға, көлік қызметтері (жылдық мәнде) – 11,1%-ға, қонақүй қызметтері – 10,3%-ға, білім беру қызметтері – 8,9%-ға, сондай-мобильді байланыс және интернет – 7,6%-ға қымбаттаған.
Статистика мамандарының айтуынша, бұл бақылау уақытында еліміздегі 537 тауар мен қызмет түрі жіті тексерілген.
Жылдық мәнде 2026 жылғы мамыр айында инфляция 10,4% құрады. Азық-түлікке жатпайтын тауарлар 11,7% өсті, азық-түлік өнімдері 10,7% , ақылы қызметтер 8,7% артты, деді бюрода.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
