Тұрғын үй кешендеріндегі қоғамдық тамақтану орындарының қауіпсіздігі тексеріледі
Еңбек инспекциясы кеңейтілген өкілеттіктерге ие болады
Еңбек және халықты әлеуметтік қорғау министрлігі мемлекеттік еңбек инспекциясының функцияларын кеңейтуді көздейтін заңнамаға өзгерістер дайындайды. Сейсенбі күні үкімет отырысында премьер-министр Олжас Бектенов осындай тапсырма берді, деп хабарлайды Kapital.kz іскерлік ақпарат орталығының тілшісі.
«Еңбек министрлігі мүдделі мемлекеттік органдармен бірлесіп, мемлекеттік еңбек инспекциясына кеңейтілген функциялар беру бөлігінде заңнамалық түзетулер әзірлеуі керек. Бұл еңбек тәртібін күшейтуге және еңбек қауіпсіздігін сақтауға ықпал етеді, бұл тек ірі кәсіпорындарда ғана емес, шағын және орта бизнес саласында да жүзеге асуы тиіс», - деп тапсырды Олжас Бектенов үкімет отырысында.
Министрлер кабинетінің басшысы тұрғын үйлерде орналасқан немесе жапсарлас салынған үй-жайлары бар қызмет көрсету саласындағы ұйымдардағы қауіпсіздік мәселелеріне де назар аударды. Осыған байланысты әкімдіктерге, Төтенше жағдайлар министрлігіне және Бас прокуратураға қоғамдық тамақтану орындарын тексеруді ұйымдастыру тапсырылды.
Премьер-министрдің айтуынша, мұндай іс-шаралардың негізгі міндеті газ баллондарын сақтау және газ жабдықтарын қауіпсіз пайдалану талаптарының сақталуын бақылау болады. Бұл шаралар төтенше жағдайлардың туындау қаупін азайтуға және қызметкерлер мен көппәтерлі үйлер тұрғындары үшін қауіпсіздік деңгейін арттыруға мүмкіндік береді деп күтілуде.
Еске сала кетейік, 2025 жылғы қыркүйекте Астанадағы тұрғын үй кешеніне кіріктірілген дәмханадағы өрттің салдарынан сегіз пәтер зардап шеккен болатын.
Осы жылдың ақпан айында Щучинскідегі дәмханада газ баллоны жарылды. Сол кезде алты адамның қаза тапқаны хабарланған еді. Кейінірек құрбандар саны 11-ге дейін өсті. Оқиға фактісі бойынша қылмыстық іс қозғалды. Сондай-ақ «Центр плова» дәмханасының иесі ұсталғаны белгілі болды. 4 наурызда ол екі айға қамауға алынды. Дәмханадағы жарылыстың себептері мен мән-жайларын анықтау жөніндегі ведомствоаралық комиссия құрылды. Оқиға салдарынан 28 адам зардап шекті, оның 13-і ауруханаға жатқызылды, 8-і медициналық көмек көрсетілгеннен кейін үйіне жіберілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
