• Басты бет
• Мемлекет
• Бурабай, Алакөл, Балқаш: жазғы демалыс орындарына апаратын жолдардың жағдайы қандай?

Бурабай, Алакөл, Балқаш: жазғы демалыс орындарына апаратын жолдардың жағдайы қандай?

Көлік министрлігі туристік бағыттарға баратын негізгі автожолдар маусымға дайын екенін мәлімдеді

Жазғы демалыс маусымы қарсаңында Қазақстанның танымал туристік бағыттарына апаратын жолдардың сапасы мен қолжетімділігі өзекті мәселелердің біріне айналады. Көлік министрлігінің мәліметінше, бүгінде Бурабай, Алакөл, Балқаш, Баянауыл және Қарқаралы сияқты негізгі курорттық аймақтарға баратын автомобиль жолдары нормативтік жағдайға келтіріліп, туристерді қабылдауға дайын, деп хабарлайды Kapital.kz іскерлік ақпарат орталығы.

Ведомство еліміздегі туристік нысандардың көліктік қолжетімділігін арттыру бағытында жүйелі жұмыстар жүргізіліп жатқанын хабарлады. Оның ішінде автомобиль жолдарын жөндеу, жол бойындағы сервисті дамыту және қауіпсіз қозғалыс үшін қажетті инфрақұрылымды жаңарту шаралары бар.

Бүгінде қазақстандық және шетелдік туристер арасында ең танымал бағыттардың бірі – Бурабай курорттық аймағы болып отыр. Бұл бағытқа қатынас негізінен Щучинск қаласы арқылы өтетін «Астана – Петропавл» республикалық автожолы арқылы жүзеге асырылады. Министрлік бұл жолдың демалушылар үшін ең қолайлы бағыттардың бірі екенін атап өтті.

Ал Зеренді демалыс аймағына келушілер «Көкшетау – Атбасар» бағыты немесе «Щучинск – Зеренді» автомобиль жолы арқылы жете алады. Соңғысы Ақмола облысындағы екі танымал курорттық аумақты өзара байланыстырады.

Қарағанды облысындағы Қарқаралы курорттық аймағына баратын республикалық маңызы бар «Қарағанды – Қарқаралы» автомобиль жолы былтыр жөндеуден өткен. Нәтижесінде жолдың сапасы жақсарып, қозғалыс қауіпсіздігі артты, деді министрлікте.

Павлодар облысындағы Баянауылға демалушылар республикалық маңызы бар «Қалқаман – Баянауыл – Ботақара» автожолы арқылы қатынай алады. Бұл бағыт Павлодар және Қарағанды облыстарын байланыстыратын маңызды көлік дәліздерінің бірі саналады.

Жазғы маусымда сұраныс жоғары бағыттардың қатарында Балқаш көлі де бар. Көлге автокөлікпен екі бағыт арқылы жетуге болады. Негізгі бағыт – «Қарағанды – Алматы» автомобиль жолы. Одан әрі туристер Балқаш қаласынан Бұрылбайтал ауылына дейін көлдің батыс жағалауы бойымен қозғалады. Бұл учаскеде жақында жүргізілген реконструкция жол сапасын айтарлықтай жақсартқан.

Сонымен қатар ведомство Балқаштың оңтүстік-шығыс жағалауына облыстық маңызы бар «Алматы – Өскемен – Лепсі – Ақтоғай» жолы арқылы жетуге мүмкіндік барын еске салды.

Ал Алакөлге демалушылар үшін екі негізгі бағыт қарастырылған. Солтүстік жағалауға «Талдықорған – Өскемен» автожолынан «Таскескен – Бақты» бағыты арқылы, одан әрі «Мақаншы – Қабанбай» жолымен жетуге болады. Ал оңтүстік жағалауға апаратын «Үшарал – Достық» автожолы соңғы жылдары толық жаңғыртылып, көл жағалауымен тұрақты әрі сенімді көлік байланысын қамтамасыз етіп отыр.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз