БЖЗҚ атын жамылған алаяқтар: Қор қазақстандықтарға ескерту жасады
Қор өз қызметкерлері азаматтарға қоңырау шалмайтынын ескертті
Қазақстанда зейнетақы жинақтарын қайта есептеп, мөлшерін арттырып беруді уәде ететін жаңа алаяқтық схемасы белең алуда. Бірыңғай жинақтаушы зейнетақы қоры (БЖЗҚ) азаматтарды сақ болуға шақырады, деп хабарлайды Kapital.kz іскерлік ақпарат орталығы қордың баспасөз қызметіне сілтеме жасап.
Соңғы уақытта Қор бөлімшелеріне «міндетті зейнетақы жарналары аударылмаған» деген хабарлама алған азаматтар жиі жүгіне бастаған. Белгілі болғандай, белгісіз тұлғалар өздерін БЖЗҚ қызметкері ретінде таныстырып, еңбек өтілінің есепке алынбай қалғанын алға тартады. Осы негізде зейнетақыны қайта есептеу арқылы оның көлемін өсіруді ұсынады.
Қордың мәліметінше, алаяқтар сенімге кіру үшін БЖЗҚ-ның нақты жұмыс істейтін бөлімшелерінің мекенжайын атап, азаматтарды сол жерге келуге шақырады.
«Филиалға жүгінушілердің айтуынша, алаяқтар қызметті жедел әрі ыңғайлы алу үшін алдын ала электрондық кезекке қоямыз деген сылтаумен ұялы телефонға келген SMS растау кодын айтуды сұрайды. Өкінішке қарай, мұндай кодтарды алаяқтарға хабарлап қойған азаматтар да бар», — делінген хабарламада.
БЖЗҚ қоңырау шалушы тұлғаның азаматтардың аты-жөнін, ЖСН-ін, мекенжайын немесе жұмыс орнын білуі оның ресми қызметкер екенін білдірмейтінін ескертеді. Мұндай жеке мәліметтер алаяқтардың қолына ашық дереккөздерден түсуі мүмкін.
Сонымен қатар БЖЗҚ қызметкерлері азаматтарға қоңырау шалмайтынын ескертті. Телефон арқылы, электрондық пошта немесе мессенджерлерде SMS-кодтарды, құпия сөздерді, банк карталарының деректемелерін және өзге де құпия ақпаратты ешқашан сұрамайды, деді қорда.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
