Қазақстанда АЭС салу: Ресеймен ядролық қауіпсіздік келісімі бекітілді
Екі ел ядролық және радиациялық қауіпсіздік саласындағы ынтымақтастықты кеңейтеді
Қазақстан мен Ресей 2026–2030 жылдарға арналған ядролық және радиациялық қауіпсіздікті реттеу жөніндегі бірлескен іс-шаралар жоспарына қол қойды. Құжат АЭС салу жобасы аясында заңнаманы жетілдіруді көздейді, деп хабарлайды Kapital.kz іскерлік ақпарат орталығы Атом энергиясы жөніндегі агенттікке сілтеме жасап.
2026 жылғы 28 мамырда Ресей Федерациясы Президентінің Қазақстанға мемлекеттік сапары аясында Қазақстан Республикасының Атом энергиясы жөніндегі агенттігі мен Ресей Федерациясының Экологиялық, технологиялық және атомдық қадағалау жөніндегі федералдық қызметі арасында 2026–2030 жылдарға арналған ведомствоаралық ынтымақтастық жоспарына қол қойылды. Құжат атом энергиясын бейбіт мақсатта пайдалану кезінде ядролық және радиациялық қауіпсіздікті реттеу саласындағы өзара түсіністік туралы меморандумды іске асыруға бағытталған.
Іс-шаралар жоспары екі елдің салалық ведомстволары арасындағы әріптестікті кеңейтуді және қол жеткізілген келісімдерді практикалық тұрғыда жүзеге асыруды көздейді.
Құжат аясында лицензиялау, бақылау-қадағалау қызметі, сараптамалық кеңестер өткізу, семинарлар ұйымдастыру, тағылымдамалар жүргізу және ядролық әрі радиациялық қауіпсіздік мәселелері бойынша тәжірибе алмасу жоспарланған.
Сонымен қатар нормативтік-құқықтық базаны жетілдіру, кадрлық әлеуетті күшейту және атом электр станциясын салу жобасын жүзеге асыру үшін Қазақстан заңнамасын бейімдеу мәселелеріне басымдық беріледі.
Агенттік жоспарды іске асыру екіжақты ынтымақтастықты нығайтып қана қоймай, ядролық және радиациялық қауіпсіздікті реттеудің ұлттық жүйесін дамытуға, халықаралық тәжірибені енгізуге және атом энергиясын қауіпсіз пайдалануға арналған тиімді реттеушілік инфрақұрылым қалыптастыруға мүмкіндік беретінін атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
