- Басты бет
- Мемлекет
- Қазақстан, Тәжікстан және Өзбекстан «Бахри-Точик» су қоймасының жұмыс режиміне келісім жасады
Қазақстан, Тәжікстан және Өзбекстан «Бахри-Точик» су қоймасының жұмыс режиміне келісім жасады
Келісім Түркістан облысының Мақтаарал және Жетісай аудандары диқандарын сумен қамтамасыз етуді көздейді
2026 жылғы маусым-тамыз айларына арналған «Бахри-Точик» су қоймасының жұмыс режимін Қазақстан Республикасының су ресурстары және ирригация министрі Нұржан Нұржігітов, Тәжікстан Республикасының энергетика және су ресурстары министрі Джума Далер және Өзбекстан Республикасының су шаруашылығы министрі Шавкат Хамраев келісті, деп хабарлайды Kapital.kz іскерлік ақпарат орталығы еліміздің су ресурстары және ирригация министрлігінің баспасөз қызметіне сілтеме жасап.
Тараптар үшжақты хаттамаға қол қойды. Бекітілген жұмыс режиміне сәйкес, «Бахри-Точик» су қоймасы арқылы жаз мезгілінде Түркістан облысының Мақтаарал және Жетісай аудандарының диқандары сумен қамтамасыз етіледі.
«Оңтүстік өңірлерді суармалы сумен қамтамасыз ету мәселесі ерекше бақылауда. Қол жеткізілген келісімдер Орталық Азия елдері арасындағы сындарлы өзара іс-қимыл мен өзара қолдаудың нәтижесі. Қабылданған шаралар вегетациялық кезеңнің тұрақты өтуін қамтамасыз етіп, отандық аграршыларды қолдауға мүмкіндік береді», — деді Қазақстанның су ресурстары және ирригация министрі Нұржан Нұржігітов.
Кездесу қорытындысы бойынша Қазақстан, Тәжікстан және Өзбекстанның су шаруашылығы ведомстволарының басшылары өңірдегі су ресурстарын ұтымды әрі өзара тиімді пайдалану саласындағы ынтымақтастықты одан әрі нығайтуға дайын екенін растады.
Бұған дейін аграршылар су тапшылығына тап болуы мүмкін екені хабарланған болатын. Әсіресе бұл Арал-Сырдария және Шу-Талас бассейндеріне қатысты. Вегетациялық кезеңде су тапшылығының қаупі 1 млрд текше метрге жетуі мүмкін. Ал Еуразиялық даму банкі бес жылдан кейін Орталық Азия созылмалы су тапшылығына ұшырауы мүмкін деп есептейді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
