Шымкенттегі Sin Yuan Steel зауытында рейд: сотқа дейінгі тергеу басталды
Инвестор құқықтарын қорғау комитеті полиция әрекеттерінің заңдылығын тексереді
Инвесторлардың құқықтарын қорғау комитеті Шымкент қаласындағы металлургиялық Sin Yuan Steel зауытында жүргізілген рейдке байланысты сотқа дейінгі тергеу басталғанын хабарлады, деп жазады Kapital.kz іскерлік ақпарат орталығының тілшісі.
Ведомство мәліметінше, инвестициялық прокурорлар зауыт басшылығының полиция әрекеттеріне қатысты шағымы негізінде істі тіркеген.
«БАҚ-та ТОО «Sin Yuan Steel» компаниясының Шымкент полициясының заңсыз әрекеттері туралы өтініші жарияланды. Инвестордың уәждерін тексеру мақсатында Шымкент қаласының инвестициялық прокурорлары сотқа дейінгі тергеуді тіркеді. ҚР ҚПК-нің 201-бабына сәйкес өзге ақпарат жария етілмейді», – делінген хабарламада.
Ақпаратқа сәйкес, құқық қорғау органдары кәсіпорын аумағына анонимді хабарлама түскеннен кейін барған. Хабарламада зауытта адамдар заңсыз ұсталып, мәжбүрлі еңбекке тартылып жатқаны айтылған. Алайда бұл дерек расталмаған.
Сонымен қатар тексеріс барысында қытайлық азаматтарға қатысты көші-қон режимін бұзу фактілері анықталған.
Айта кетейік, бұған дейін Ақмола облысында экотуризм жобасына бөлінген 16 мың гектар жерді қайтару әрекеті жасалған болатын. Бұл іске де Қазақстан Республикасы Бас прокуратурасы жанындағы Инвесторлардың құқықтарын қорғау комитеті араласқан. Сондай-ақ Қазақстанда инвесторларға кедергі келтіргені үшін 326 лауазымды тұлға жауапқа тартылғаны хабарланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
