Қазақстан Қытайға ауыл шаруашылығы өнімі экспортын 82,4%-ға арттырды
ҚХР-ға өнім жеткізу құқығына ие кәсіпорындар тізіліміне 3,6 мыңнан астам компания енді
2026 жылдың үш айында Қазақстанның Қытайға ауыл шаруашылығы өнімдерінің экспорты 82,4%-ға артып, 550 млн долларға жетті. Бұл туралы Ауыл шаруашылығы вице-министрі Ермек Кенжеханұлының ҚХР Азық-түлік және стратегиялық резервтер жөніндегі мемлекеттік басқармасының (NAFRA) басшысы Лю Хуаньсиньмен кездесуі барысында белгілі болды, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.
Аграрлық ведомствоның мәліметінше, келіссөздер барысында тараптар екіжақты ынтымақтастықтың қазіргі жағдайы мен даму перспективаларын, ауыл шаруашылығы өнімдерінің өзара саудасын кеңейту, инвестициялық жобаларды іске асыру және азық-түлік қауіпсіздігін нығайту мәселелерін талқылады. Ермек Кенжеханұлы Қытайдың Қазақстанның аграрлық саладағы негізгі стратегиялық серіктестерінің бірі болып қала беретінін атап өтті.
«2025 жылдың қорытындысы бойынша екі ел арасындағы ауыл шаруашылығы өнімдерінің тауар айналымы 36,8%-ға артып, 1,97 млрд долларды құрады. 2026 жылдың қаңтар-наурыз айларында бұл көрсеткіш 61,7%-ға өсіп, 697 млн долларға жетті. 2025 жылдың қорытындысы бойынша ҚХР-ға АӨК өнімдерінің экспорты 35,3%-ға артып, 1,43 млрд АҚШ долларын құрады. Экспорттың негізгі бөлігін жем-шөп, өсімдік майлары, зығыр және күнбағыс тұқымдары, рапс майы құрайды. Биылғы жылдың үш айында экспорт 82,4%-ға өсіп, 550 млн долларға жетті», – деп хабарлады АШМ.
Қазіргі уақытта Қазақстан мен Қытай арасында ауыл шаруашылығы өнімдерінің 34 түрін экспорттау бойынша хаттамаларға қол қойылған. Оның ішінде өсімдік шаруашылығы өнімдерінің 21 түрі және мал шаруашылығы өнімдерінің 13 түрі бар. Қытайға өнім жеткізу құқығына ие кәсіпорындар тізіліміне 3 601 кәсіпорын енгізілген.
Өз кезегінде Лю Хуаньсинь екі ел арасындағы аграрлық ынтымақтастықтың әлеуеті жоғары екенін атап өтіп, Қытай тарапы сапалы өнімді тұрақты жеткізуге мүдделі екенін растады.
«Сіздің еліңіз Қытай үшін азық-түлік қауіпсіздігін қамтамасыз ету және ауыл шаруашылығы өнімдерін жеткізудің тұрақты тізбегін дамыту бағытындағы маңызды серіктес болып табылады. Біз практикалық өзара іс-қимылды одан әрі нығайтуға, сауданы кеңейтуге және астық саудасы, логистика мен өңдеу салаларындағы бірлескен жобаларды қолдауға дайынбыз», – деді NAFRA басшысы.
Кездесуде астық және майлы дақылдарды жеткізу бойынша ұзақмерзімді келісімшарттар жасау, логистикалық хабтар мен «құрғақ порттар» құру, сондай-ақ ауыл шаруашылығы өнімдерін сақтау және өңдеу технологияларымен алмасу перспективаларына ерекше назар аударылды.
Келіссөздер аясында астық саудасының цифрлық құралдарын дамыту тақырыбы ерекше талқыланды. Қазақстан тарапы астық дақылдарымен сауда жасауға арналған цифрлық платформаны енгізу бойынша Қытай тәжірибесін зерделеуге қызығушылық білдірді. Кездесу қорытындысы бойынша бірлескен қазақстан-қытай астық сауда платформасын құру туралы келісімге қол жеткізілді. Жоба «Бір белдеу, бір жол» бастамасы аясындағы ҚХР мен Орталық Азия елдерінің іс-қимыл жоспарына сәйкес іске асырылады.
Платформа Қытай тарапының қолданыстағы Ұлттық интернет-астық сауда платформасы негізінде құрылады және екі ел бизнесіне бәсекелі сауда-саттық пен тікелей келіссөздер арқылы мәмілелер жасауға мүмкіндік береді. Ауыл шаруашылығы министрлігінің мәліметінше, алаңның негізгі ассортименті сояға және басқа да майлы әрі май-тоңмай дақылдарына бағытталады.
Сонымен қатар Қазақстан Республикасы ауыл шаруашылығы министрлігі мен NAFRA арасында өзара түсіністік туралы меморандумға, сондай-ақ Азық-түлік келісімшарт корпорациясы мен NAFRA жанындағы Астық саудасын үйлестіру орталығы арасында ынтымақтастық туралы келісімге қол қойылды.
Бұған дейін Циндаода өткен сауда-экономикалық миссия қорытындысы бойынша қазақстандық компаниялар қытайлық серіктестермен жалпы сомасы 125 млн доллар болатын келісімдерге қол жеткізгені хабарланған болатын. Миссияға 25-тен астам компания қатысты. Сиань қаласында Ұлытау облысы мен Шэньси провинциясы арасындағы сауда-экономикалық ынтымақтастық форумында жалпы сомасы 12,5 млрд теңгеге алты меморандумға қол қойылды.
2025 жылғы 2 қыркүйекте өткен Қазақстан-Қытай Іскерлік кеңесінің отырысында жалпы сомасы 15 млрд доллардан асатын 70-тен астам коммерциялық құжатқа қол қойылды. Бұған дейін Қасым-Жомарт Тоқаев Қазақстан мен Қытай арасындағы ынтымақтастықты дамытудың басым бағыттарын айқындаған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
