Air Astana акционерлерге 3,5 млрд теңге дивиденд төлейді
Бір акцияға шаққандағы дивиденд көлемі 9,92 теңгені құрады
Air Astana акционерлері 2025 жылдың қорытындысы бойынша дивиденд төлеуге 3 млрд 511 млн теңге бағыттау туралы шешім қабылдады. Бұл туралы әуе тасымалдаушысы Қазақстан қор биржасына (KASE) хабарлады, деп жазады Kapital.kz іскерлік ақпарат орталығы.
«Акционерлердің жылдық жалпы жиналысында 2025 жылдың қорытындысы бойынша бір жай акцияға 9,92 теңге көлемінде дивиденд бекіту туралы шешім қабылданды. Дивиденд төлеу 2026 жылғы 25 маусымда басталады», – делінген авиакомпания хабарламасында.
Бір жаһандық депозитарлық қолхаттың (ЖДҚ) дивиденді төрт жай акцияның дивидендіне тең болғандықтан, бір ЖДҚ бойынша төлем көлемі 39,68 теңгені құрайды. Бұған дейін дәл осындай көлемдегі дивидендті төлеуді компанияның директорлар кеңесі ұсынған еді.
2025 жылы авиакомпанияның таза пайдасы 7 млрд теңгені құрады. Осылайша, Kapital.kz есебі бойынша, компания дивидендке таза пайданың 50%-ын бағыттап отыр.
2024 жылдың қорытындысы бойынша жай акцияларға төленген дивиденд көлемі биылғыдан 5,4 есе жоғары – бір акцияға 53,7 теңге болған. Ал бір ЖДҚ үшін 214,8 теңге төленген. Жалпы алғанда, компания акционерлерге 19,1 млрд теңге, оның ішінде 6 млрд 304 млн теңге көлемінде жай дивиденд және 12 млрд 795 млн теңге көлемінде арнайы дивиденд төлеуі тиіс болған.
Сол кезде төлемдерге компанияның таза пайдасының 74,8%-ы бағытталған еді. Бұл IPO-дан кейінгі алғашқы дивиденд төлемі болды.
Еске салсақ, 2018-2023 жылдар аралығында авиакомпания дивидендті бір рет – 2023 жылдың қорытындысы бойынша төлеген. Оның көлемі 7,1 млрд теңгені немесе таза пайданың 20%-ын құрады.
2025 жылғы наурызда әуе тасымалдаушысы жаңа дивидендтік саясатты бекіткенін хабарлаған болатын. Оған сәйкес, дивиденд көлемі жылдық шоғырландырылған таза пайданың 30%-50%-ы аралығында белгіленеді. Бұған дейін бұл шек 20%-дан аспайтын. Сол жылы арнайы дивидендтер де енгізілді.
Лондон қор биржасының (LSE) мәліметінше, 29 мамыр күні Лондон уақытымен 09:12-де Air Astana-ның ЖДҚ қағаздары бойынша соңғы мәміле 5,48 доллар бағасымен жасалған. Соңғы 12 айда олардың құны 5,22-7,08 доллар аралығында құбылды.
2024 жылдың қаңтар-ақпан айларында Air Astana LSE, KASE және AIX алаңдарында IPO өткізіп, шамамен 370 млн доллар тартты. IPO кезінде компания акцияларын 1073,83 теңгеге (сол кездегі бағаммен шамамен 2,4 доллар), ал ЖДҚ қағаздарын 9,5 долларға сатып алуға болатын.
IPO нәтижесінде Бірыңғай жинақтаушы зейнетақы қоры (БЖЗҚ) авиакомпания капиталының 6,55%-ын иеленген акционер атанды. Қазіргі таңда оның үлесі 6,51%-ды құрайды.
Сондай-ақ IPO кезінде Еуропа қайта құру және даму банкі (ЕҚҚДБ) CITIBANK, N.A.-NY номиналды ұстаушысы арқылы авиакомпания капиталының 5%-ын иеленді. KASE дерегіне сәйкес, 2026 жылғы 1 қаңтардағы жағдай бойынша Самұрық-Қазына қорының үлесі 41%, ал британдық BAE Systems компаниясының үлесі 6,8% болды.
2025 жылғы желтоқсанда BAE Systems-тің еншілес компаниясы – BAE Systems (Kazakhstan) Limited Air Astana-дағы 10,1% үлесін сатқан. Kapital.kz есебі бойынша, осы мәміледен кейін оның үлесі 16,95%-дан 6,8%-ға дейін төмендеген. Компания 9 млн GDR қағазын бір данасын 5,8 доллардан сатып, 52,2 млн доллар тартқан.
Ал 2026 жылғы наурызда BAE Systems (Kazakhstan) авиакомпаниядағы қалған 6,86% үлесін де сататыны белгілі болды. Компания 6 109 982 ЖДҚ қағазын шектеулі институционалдық инвесторлар тобына бір данасын 5,10 доллардан сатуға келіскен. Kapital.kz есебі бойынша, бұл мәміледен компания шамамен 31,1 млн доллар табыс тапқан.
Айта кетейік, 2026 жылғы 31 наурыз Питер Фостер үшін Air Astana-ның бас атқарушы директоры және директорлар кеңесінің мүшесі ретіндегі соңғы жұмыс күні болды. Ол авиакомпанияны 20 жыл басқарды және енді директорлар кеңесінің аға кеңесшісі ретінде жұмысын жалғастырады.
2026 жылғы 1 сәуірден бастап бас атқарушы директор қызметіне бұған дейін қаржы жөніндегі атқарушы директор болған Ибрахим Жанлыел тағайындалды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
