Иран Қазақстанның агросекторына 120 млн доллар инвестиция салады
Golrang Industrial Group Қазақстанда май өңдеу және құс шаруашылығы жобаларын бастайды
Қазақстанда Иранның Golrang Industrial Group компаниясы май өңдеу зауыты мен құс фабрикасын салады, деп хабарлайды Kapital.kz іскерлік ақпарат орталығы Ауыл шаруашылығы министрлігіне сілтеме жасап.
Тиісті келісімге Ауыл шаруашылығы вице-министрі Ермек Кенжеханұлы мен компания басшысы Фазли Мехди Мохаммадкарим арасындағы кездесу барысында қол қойылды. Министрлік мәліметінше, жалпы инвестиция көлемі 120 млн АҚШ долларын құрайды.
«Алғашқы жобада тәулігіне 3 мың тоннаға дейін күнбағыс өңдейтін заманауи май экстракциялау зауыты салынады деп күтілуде. Оған 70 млн доллар көлемінде тікелей инвестиция тарту жоспарланған. Жоба ауыл шаруашылығы шикізатын терең өңдеуді арттырып, өнімнің қосылған құнын едәуір өсіруге мүмкіндік береді», делінген ақпаратта.
Сонымен қатар инвестор құны 50 млн доллар болатын заманауи жұмыртқа бағытындағы құс фабрикасының құрылысына қаржы салады. Жоба өндіріс көлемін ұлғайтуға және өнім сапасын арттыруға бағытталған. Бірлескен жобаларды жүзеге асыру екіжақты ынтымақтастықтың тұрақты өсімі аясында жүргізілмек.
Айта кетейік, 2025 жылдың қорытындысы бойынша осы салада Қазақстан мен Иран арасындағы тауар айналымы 55,8%-ға өсіп, 341 млн АҚШ долларынан асты. Бұл ретте, негізгі бөлігін бидай мен арпа секілді дәнді дақылдар құрайтын қазақстандық экспорт көлемі екі есеге жуық артты.
.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
