• Басты бет
• Экономика
• Қазақстанда энергия тұтынушылардың цифрлық бейіндерін жасау мәселесі пысықталып жатыр

Қазақстанда энергия тұтынушылардың цифрлық бейіндерін жасау мәселесі пысықталып жатыр

Елде электр энергиясына деген сұранысты басқару тетіктерін енгізу көзделуде

Қазақстанда электр энергиясына деген сұранысты басқару тетіктерін енгізу жоспарланып отыр, деп хабарлайды Kapital.kz іскерлік ақпарат орталығы Энергетика министрлігінің баспасөз қызметіне сілтеме жасап.

«Энергетика министрлігі БҰҰ Даму бағдарламасымен (БҰҰДБ) бірлесіп, цифрлық зияткерлік электр желілерін дамыту және электр энергиясына деген сұранысты басқару тетіктерін енгізу жөніндегі жобалық бастаманы пысықтауға кірісті. Астанада Энергетика министрлігі, БҰҰДБ, «KEGOC» АҚ, Мемлекеттік энергетикалық қадағалау және бақылау комитеті өкілдерінің, сондай-ақ халықаралық және отандық сарапшылардың қатысуымен жұмыс кездесулері өтті. Шара «Сұранысты басқару» (Demand-driven Digital Smart Grids) бірлескен жобасын дайындау аясында ұйымдастырылды», - деп хабарлады Энергетика министрлігінің баспасөз қызметі.

Жобаның негізгі мақсаты — заманауи цифрлық технологиялар мен сұранысты басқару құралдарын енгізу есебінен Қазақстанның электр энергетикалық жүйесінің жұмыс тиімділігін арттыру үшін жағдай жасау.

Талқылау барысында жобаның негізгі элементтері қаралды, оның ішінде электр энергиясы нарығындағы агрегаторлар институтын дамыту, тұтынушылардың цифрлық бейіндерін қалыптастыру, тұтынушылардың сұранысты басқару бағдарламаларына қатысуы үшін экономикалық ынталандыру шараларын жасау, деректерді өңдеу мен қорғаудың заманауи тетіктерін енгізу, сондай-ақ белсенді электр энергиясын тұтынушы тұжырымдамасын дамыту бар. Осы тәсілдерді іске асыру энергия жүйесінің икемділігін арттыруға, ең жоғары тұтыну сағаттарындағы жүктемені азайтуға, жаңартылатын энергия көздерін, энергия жинақтау жүйелерін және басқа да заманауи энергетикалық технологияларды тиімдірек кіріктіруді қамтамасыз етуге мүмкіндік береді.

Энергетика министрлігі зияткерлік желілерді дамыту мен электр энергетикасын цифрландыруды саланы жаңғыртудың маңызды бағыттарының бірі ретінде қарастырады. Жоба сонымен қатар энергиямен жабдықтаудың сенімділігін арттыруға, цифрлық инфрақұрылымды дамытуға және энергетика секторының кибертұрақтылығын нығайтуға септігін тигізеді.

Кездесулер қорытындысы бойынша тараптар Қазақстан Республикасының электр энергетикасын цифрлық трансформациялау саласындағы бірлескен бастамаларды іске асыруға негіз болатын жобалық құжатты дайындау жөніндегі алдағы қадамдарды айқындады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз