• Басты бет
• Экономика
• Жамбыл облысындағы «Total Energies» жел электр станциясының құрылысы тоқтап қала жаздады

Жамбыл облысындағы «Total Energies» жел электр станциясының құрылысы тоқтап қала жаздады

Мемлекеттік тіркеу негізсіз созылып кеткен

Жамбыл облысында құны 765 миллиард теңге болатын жел электр станциясының құрылысы тоқтап қалу алдында тұрды. Облыстық прокуратураның баспасөз қызметіне сілтеме жасаған Kapital.kz іскерлік ақпарат орталығының мәліметінше, «Total Energies» инвесторы ұзақ уақыт бойы мемлекеттік тіркеуден өте алмаған.

«Жамбыл облысы Мойынқұм ауданының прокуратурасы Инвесторлардың құқықтарын қорғау комитетімен бірлесіп, жел электр станцияларын салу бойынша ірі жобаны жүзеге асырып жатқан «Total Energies» ЖШС-нің құқықтарын қорғады. Инвестицияның жалпы көлемі — 765 миллиард теңге. Жоба жаңартылатын энергия көздерінен жыл сайын 1 ГВт-қа дейін электр энергиясын өндіруге, 150 жұмыс орнын ашуға және бюджетке қосымша салық түсіруге мүмкіндік береді. Инвесторға нысан құрылысы үшін ауданы 1 693 гектар жер телімі берілгені анықталды. Алайда уәкілетті органның әкім қаулысын мемлекеттік тіркеуді созбалаңға салуы салдарынан жобаның жүзеге асуына қауіп төнді», — делінген қадағалау органының мәліметінде.

Прокурорлық араласудан кейін заң бұзушылықтар жойылып, қаулы белгіленген тәртіппен тіркелді, сондай-ақ инвестордың құқықтары қалпына келтірілді. Кінәлі лауазымды тұлға тәртіптік жауапкершілікке тартылды.

Еске сала кетейік, 2025 жылдың ақпанында Жамбыл облысында «Total Energies» компаниясының қатысуымен қуаттылығы 1 ГВт болатын жел электр станциясы салынатыны хабарланған еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз