Қазақстанда сұлулық салондарының қызметі 15%-ға қымбаттады
Көрсетілген бьюти-қызметтердің көлемі екі еседен астам артты
Қазақстанда шаштараздар мен сұлулық салондары көрсететін қызметтердің көлемі күрт өсті. 2026 жылдың бірінші тоқсанының қорытындысы бойынша бұл көрсеткіш 40,5 млрд теңгені құрады, бұл өткен жылдың сәйкес кезеңімен салыстырғанда 2,3 есе көп. Салыстырмалы түрде айтсақ: 2025 жылдың бірінші тоқсанында бұл көрсеткіш 17,7 млрд теңге, ал бір жыл бұрын 18,7 млрд теңге болған еді, деп жазады energyprom.kz.
Ұзақмерзімді динамикада да нарықтың айтарлықтай кеңейгені байқалады. Егер 10 жыл бұрын шаштараздар мен сұлулық салондары 5,9 млрд теңгенің қызметін көрсетсе, 2026 жылдың бірінші тоқсанына қарай бұл көрсеткіш шамамен жеті есе өскен.
Ауылдық жерлерде де осы сектордағы қызмет көлемі артты, бірақ жалпы нарықтағы үлесі төмендеді. 2026 жылдың бірінші тоқсанында ауылдық шаштараздар мен сұлулық салондары 1,5 млрд теңгенің қызметін көрсетті, ал бір жыл бұрын бұл көрсеткіш 1,3 млрд теңге болған еді. Бір жылдағы өсім 12,3%-ды құраса, он жыл ішінде бұл көрсеткіш үш еседен астам ұлғайды.
Осыған қарамастан, шаштараздар мен сұлулық салондары көрсеткен жалпы қызмет көлеміндегі ауылдық жерлердің үлесі 3,7%-ға дейін азайды. Салыстыру үшін: 2025 жылдың бірінші тоқсанында ауылдың үлесі 7,6%, 2024 жылы — 7,1%, ал 2016 жылы 8% болған. Мұндай динамика ағымдағы жылы нарықтың негізгі өсімі қалаларға тиесілі болғанын аңғартады.
Шаштараздар мен сұлулық салондарының қызметі тоқтаусыз қымбаттап келеді. Бағаның өсіп жатқанына қатарынан 54 ай болды, ал статистика жүргізіле бастағаннан бері, яғни 2011 жылдан бері бағаның төмендеуі мүлдем тіркелмеген. Биылғы жылы ең айтарлықтай қымбатшылық қаңтар айында байқалды: 2,3%. Ақпанда шаштараздар мен сұлулық салондары қызметінің бағасы 0,8%-ға, наурызда — 1,9%-ға, сәуірде — 1,5%-ға, мамырда 1,4%-ға өсті.
Жылдық көрсеткіш бойынша 2026 жылдың мамырында сектордағы қызметтер өткен жылдың мамырымен салыстырғанда 15,2%-ға қымбаттады. Бұл бағаның 14,6%-ға өсуі тіркелген 2025 жылдың мамыр айындағы қарқыннан сәл жоғары. Жалпы алғанда, соңғы жылдары шаштараздар мен сұлулық салондары қызметінің қымбаттауы ерекше байқала бастады. Егер 2017 жылдың мамырында баға 3,8%-ға, ал 2020 жылдың мамырында — 5,5%-ға өссе, 2022 жылдан бастап өсім көрсеткіші тұрақты түрде екі таңбалы саннан түспей келеді.
Өңірлер бойынша бөліністе, ағымдағы жылдың мамыр айында шаштараздар мен сұлулық салондары қызметі бағасының ең жоғары өсімі Атырау облысында тіркелді: бір жылда бірден 38,4%-ға артқан. Жоғары көрсеткіштер Алматы (22,2%-ға) және Ақтөбе (20,1%-ға) облыстарында да байқалды. Батыс Қазақстан облысында бағаның 18,9%-ға, Түркістанда — 18,6%-ға, Қарағандыда 17,6%-ға өскені тіркелді.
Ең төменгі өсім Ақмола облысына тиесілі: 3,7%. Шаштараздар мен сұлулық салондарының қызметі Маңғыстау (8%-ға), Шығыс Қазақстан (9,9%-ға) және Жетісу (10%-ға) облыстарында да салыстырмалы түрде баяу қымбаттады. Бағаның өсуі ҚР барлық өңірлерінде тіркелді.
Қызметтердің жекелеген түрлері бойынша ерлер шашын қию құны бәрінен бұрын қарқынды өсті. 2026 жылдың мамыр айында бұл қызмет өткен жылдың мамырымен салыстырғанда 17,2%-ға қымбаттады. Әйелдер шашын қию бағасы 16%-ға артты. Маникюр 12,7%-ға, педикюр — 8,9%-ға, эпиляция — 7,2%-ға, косметолог қызметі 7,5%-ға қымбаттады.
2026 жылдың мамырында Қазақстан бойынша әйелдер шашын қиюдың орташа құны 4,8 мың теңгені, ерлердікі — 3,4 мың теңгені құрады. Ірі қалалар арасында ең жоғары баға Алматыға тиесілі: мұнда әйелдер шашын қию 7,4 мың теңге, ерлердікі 5,4 мың теңге болды. Бұл республикалық орташа деңгейден айтарлықтай жоғары.
Басқа қалалардың ішінде әйелдер шашын қиюдың жоғары бағасы Ақтауда (5,3 мың теңге), Астанада (4,9 мың теңге) және Ақтөбеде (4,8 мың теңге) тіркелді, ал ең төменгі баға Семей мен Түркістанда (әрқайсысында 2,9 мың теңгеден), сондай-ақ Талдықорғанда (3,2 мың теңге) байқалды.
Ерлер шашын қию құнына келсек, Алматыдан бөлек ең жоғары баға Қарағанды (4,5 мың теңге) мен Астанада (3,8 мың теңге), ал ең төменгі баға Қызылордада (2,2 мың теңге), Семей мен Оралда (әрқайсысында 2,6 мың теңгеден) байқалды. Ерлер шашын қию құны бойынша Алматы мен Қызылорда арасындағы айырмашылық 2,4 еседен асты. Алматыда әйелдер шашын қию Семейге қарағанда 2,6 есе қымбат болды.
Жалпы алғанда, Қазақстандағы шаштараздар мен сұлулық салондары қызметінің нарығы бір жыл бұрынғы сәл бәсеңдеуден кейін, 2026 жылдың басында айтарлықтай өсті. Алайда қызмет көлемінің артуы бағаның одан әрі өсуімен қатар жүріп жатыр. Әсіресе шаш қию қызметі қатты қымбаттауда, ал ең жоғары баға деңгейі ірі қалаларда, ең алдымен Алматыда сақталып отыр. Сонымен қатар, ауылдық жерлерде қызмет көлемі өскеніне қарамастан, олардың үлесі азайып барады. Бұл нарықтың қалаларға қарай барған сайын көбірек ойысып жатқанын көрсетеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
