• Басты бет
• Экономика
• Сауда министрлігі маусымдық өнімдердің молдығынан жазда баға арзандайды деп болжайды

Сауда министрлігі маусымдық өнімдердің молдығынан жазда баға арзандайды деп болжайды

Импорттық тауарлардың құны көбіне теңге бағамына тәуелді

Соған қарамастан, Қазақстанда кейбір азық-түлік тауарлары осы жазда-ақ арзандауы мүмкін. Сауда және интеграция министрі Арман Шаққалиев нарықтағы жағдай мен валюта бағамының өнім құнына ықтимал әсерін түсіндіріп, осылай мәлімдеді, деп хабарлайды Kapital.kz іскерлік ақпарат орталығының тілшісі.

Мәжіліс кулуарында журналистер ведомство басшысынан: «Доллар бағамы 500 теңгеге жетсе, азық-түлік қымбаттай ма?» — деп сұраған еді. Бұған жауап ретінде Арман Шаққалиев министрліктің бұл мәселеде қатаң ұстанымда екенін және баға динамикасын болжау үшін америкалық валюта бағамын негізгі бағдар ретінде қарастырмайтынын атап өтті.

«Импортқа тәуелді тауарлар бойынша бағамның құбылмалылығы әсер етпей қоймайды. Әсіресе, импорттық құрамдас бөлігі бар өнімдердің бағасына тікелей ықпал етеді. Сондықтан біз үшін басты мақсат — инфляцияны белгіленген шектен асырмау, біз осы шеңберде әрекет етуіміз керек», — деді ол.

Шаққалиевтің айтуынша, жыл басынан бері әлеуметтік маңызы бар азық-түлік тауарлары бағасының өсу қарқыны өткен жылғы көрсеткіштерден айтарлықтай төмен болды. Ол бұл санаттағы өнімдердің қымбаттау жылдамдығы 2025 жылдың сәйкес кезеңімен салыстырғанда шамамен 4,5 есе азайғанын атап өтті. Бұған әлеуметтік маңызы бар тауарлар тізімінің уақытша түзетілуі де оң ықпал еткен.

Сауда министрлігінің басшысы сондай-ақ, билік нарыққа маусымдық ауыл шаруашылығы өнімдері көптеп түсетін жазғы кезеңде бағаны бақылауда ұстауға ниетті екенін мәлімдеді. Әсіресе, тұтыну бағаларының индексіне тікелей әсер ететін жаңа піскен көкөністер мен жеміс-жидектерге ерекше үміт артылып отыр.

«Біз үшін басты міндет — жазда да белгіленген дәлізде қалу. Әрине, баға индексін қалыптастырудың маңызды факторы ретінде жаңа піскен көкөністер мен жемістердің әлеуетін тиімді пайдалану қажет. Біздің ең төменгі межеміз — нөлдік көрсеткіш (бағаның өспеуі). Ал барынша қол жеткізгіміз келетін мақсат — осы тауарлар бойынша дефляцияға (бағаның төмендеуіне) қол жеткізу», — деп түйіндеді министр.

Айта кетейік, сәуір айында Қазақстандағы жылдық инфляция 10,6%-ға дейін баяулады. Тұрғындар үшін азық-түлік өнімдерінің бағасы 11,3%-ға, азық-түлік емес тауарлар 11,7%-ға, ал ақылы қызметтер 8,9%-ға өсті.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз