Астанада Цзянсу провинциясының Орталық Азиядағы өкілдігі ашылды
Ол Орталық Азиядағы қытайлық компаниялар үшін бірыңғай сервистік хабқа айналады
Астанада Цзянсу провинциясының Орталық Азиядағы өкілдігі ашылды, деп хабарлайды Kapital.kz іскерлік ақпарат орталығы Сауда және интеграция министрлігіне сілтеме жасап.
Ведомство хабарлауынша, «Қытай (Цзянсу провинциясы) – Қазақстан» сауда-экономикалық ынтымақтастық форумы өтті. Екі елдің мемлекеттік органдары мен бизнес өкілдерінің басын қосқан бұл шара мемлекеттер арасындағы стратегиялық серіктестікті тереңдетудің маңызды кезеңі болды.
Форум аясында ҚР Сауда және интеграция министрі Арман Шаққалиев пен Цзянсу провинциясының партия комитетінің хатшысы Синь Чжансин мырза инвестициялық байланыстардың болашағын талқылап, Астанада Цзянсу провинциясының Орталық Азиядағы орталығы ашылғанын ресми түрде жариялады. Бұл орталық өңірдегі қытайлық компаниялар үшін консалтингтік және көрме қызметтерін көрсететін, сондай-ақ «Жібек жолы» электронды коммерциясын қолдайтын бірыңғай сервистік хабқа айналады.
Қазіргі уақытта Қазақстан мен Қытай қарым-қатынасы жоғары деңгейде. Өткен жылдың қорытындысы бойынша өзара тауар айналымы рекордтық көрсеткішке жетіп, 49 миллиард долларды құрады. Қазақстан Қытай Халық Республикасының аймақтағы негізгі серіктесі саналады: Бейжіңнің Орталық Азиямен жалпы тауар айналымының шамамен 60 пайызы біздің елге тиесілі.
«Мемлекет басшыларының стратегиялық көрегендігінің арқасында бұл ынтымақтастық аймақтық байланысты нығайту мен тұрақты экономикалық өсімнің маңызды факторына айналды. Біз Цзянсу провинциясының бизнесін өнеркәсіп, ауыл шаруашылығы өнімдерін өңдеу, мұнай-газ химиясы және цифрлық технологиялар саласындағы бірлескен жобаларды жүзеге асыруға шақырамыз. Астанада Цзянсу орталығының ашылуы бірлескен жұмысымыздың заңды жалғасы әрі жаңа өндірістік тізбектерді құрудың тиімді құралы болатынына сенімдімін», — деп атап өтті Арман Шаққалиев.
Шара барысында қазақстандық тарап еліміздің инвестициялық әлеуетін таныстырып, қытайлық компанияларды жаңартылатын энергетика, электронды коммерция және көлік-логистика салаларындағы жобаларға тартылуға шақырды.
Форумның басты нәтижелерінің бірі — логистикалық ынтымақтастықты кеңейту болды. Атап айтқанда, Ақтау портында «есіктен шекараға дейін» қағидатымен бірыңғай логистикалық тізбектің бөлігіне айналатын жаңа контейнерлік жобаны іске асыру туралы шешім қабылданды. Сонымен қатар, тараптар қазақстандық экспортты әртараптандыруға уағдаласты: енді Цзянсу провинциясына бидай, ет және бал жеткізу көлемі артады.
Форумда өндіріс қуаты әлемдік көлемнің 4 пайызын құрайтын дүниежүзіндегі ең ірі индустриялық орталықтардың бірі — Цзянсу провинциясына ерекше назар аударылды. Бүгінде бұл провинцияның компаниялары Қазақстанда 63 инвестициялық жобаны жүзеге асырып жатыр. Бұл — аталған өңірдің Орталық Азия елдеріне салған жалпы инвестициясының 47 пайызы.
«Қытай мен Қазақстан — тағдырлас, етене жақын дос әрі сенімді серіктес. Арамызда бірегей стратегиялық серіктестік орнаған. Экономикаларымыз бір-бірін толықтырып тұрғандықтан, сауда көрсеткіштерін екі есе арттыруға мүмкіндік бар. Біз жасанды интеллект, «жасыл» экономика және электронды коммерция сияқты салаларда жаңа өсім нүктелерін дамытуды көздеп отырмыз. Бұл екіжақты инвестицияларға сенімді кепіл болады», — деді Синь Чжансин мырза.
Форум қорытындысы бойынша тараптар инвестициялық серіктестікті дамытуға, бірлескен өндіріс орындарын ашуға және сауда-экономикалық байланыстарды кеңейтуге ниетті екендерін растады.
Еске сала кетейік, бұған дейін Қытайдың Сиань қаласында өткен Ұлытау облысы мен Шэньси провинциясының сауда-экономикалық форумында жалпы сомасы 12,5 миллиард теңгені құрайтын алты меморандумға қол қойылған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
