Ақтөбеде кәсіпкерлер өз қаражатына қоғамдық кеңістіктерді абаттандырып жатыр
2025 жылы бұл жұмысқа 15 компания атсалысты
Ақтөбеде абаттандыру жұмыстарына демеушілер қаржысын тарту ісі қарқын алып келеді. Мәселен, 2024 жылы меценаттардың қолдауымен 5 нысан жаңартылса, 2025 жылы олардың саны 15-ке жетті. Оның ішінде саябақтар, гүлзарлар және қаладағы алғашқы кәсіби скейт-парк бар. Бұл туралы Ақтөбе облысы әкімдігінің баспасөз қызметі хабарлады.
«Жақында қаланың маңызды аумақтарының бірі – автобекет маңындағы алаң жаңа кейіпке енді. Қала әкімінің Ақтөбені абаттандыруға үлес қосу туралы үндеуін «Айс» сүт компаниясы қолдап, осы аумақты толықтай жаңартуды өз міндетіне алды», – деп мәлімдеді әкімдіктен.
Жоба аясында 3800 шаршы метрлік аумақ заманауи қоғамдық кеңістікке айналды. Мұнда көгалдандыру жұмыстары жүргізіліп, автоматты суару жүйесі орнатылды. Жаңарған нысанның сәнін келтірген басты нысан – 30 жылдан астам уақыт бойы қаңырап тұрған ескі субұрқақ. Күрделі жөндеуден кейін ол қайтадан іске қосылды.
Еске сала кетсек, осы жылдың қаңтар айында қала әкімі қоғамдық кеңістіктерді жаңғырту бойынша бірқатар жобаларды таныстырған болатын. Бағдарлама қараусыз қалған аллеяларды, гүлзарлар мен пайдаланылмай жатқан аумақтарды жаңартуды көздейді. Ауқымды жоба жалпы саны 26 нысанды қамтиды.
Бұған дейін Ақтаудағы 4А шағын ауданында орналасқан «Ақбота» саябағын ауқымды қайта жаңғырту жұмыстары басталатыны хабарланған еді. Қоғамдық кеңістікті жаңарту NCOC компаниясының демеушілік қаражаты есебінен қаржыландырылады. Жобаға салынатын инвестицияның жалпы құны – 2,5 миллиард теңге.
Ал Алматыда әл-Фараби даңғылы мен Дулати көшесінің қиылысында FLOW Паркі салынады. Жоба «Kusto Home» ЖШС және «Time Group Construction» ЖШС жеке инвесторларының қолдауымен жүзеге асырылмақ. Құрылысқа құйылатын инвестицияның жалпы сомасы 3 миллиард теңгені құрайды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
