Дональд Трамп Иранға қарсы жасалған блокаданың тоқтатылатынын жариялады
АҚШ президенті Иран Ислам Республикасы Ормуз бұғазы арқылы өтетін кемелерден ешқандай баж салығын алмайтынын мәлімдеді
АҚШ-тың Иранға қарсы теңіз блокадасы аяқталуға жақын. Бұл туралы АҚШ президенті Дональд Трамп мәлімдеді, деп хабарлайды «Интерфакс-Қазақстан».
«Біз Иранмен келісімге келдік. Баршаңызды осымен құттықтаймын! Енді мен АҚШ жүргізіп жатқан теңіз блокадасын дереу тоқтатуға пәрмен беремін», — деп жазды ол дүйсенбіге қараған түнде Truth Social әлеуметтік желісінде.
Сонымен қатар Трамп Ормуз бұғазы арқылы кемелер қозғалысының қайта басталатынын айтты. АҚШ президентінің сөзінше, Иран бұл үшін ешқандай баж салығын өндірмейді.
Кейінірек Америка лидері 19 маусымда Иранмен келісімге қол қойылғаннан кейін, Ормуз бұғазы миналардан тазарту жұмыстары үшін бірден ашылатынын нақтылады.
«Жұма күні келісімге қол қойылып, бұғаз минадан тазарту үшін ашылғаннан кейін, мұнай тасымалы аймақ пен бүкіл әлем үшін екі бағытта да қайта жанданады», — деп жазды Трамп Truth Social желісінде.
Бұған дейін Пәкістан премьер-министрі Шахбаз Шариф АҚШ пен Иран өкілдері 19 маусымда Швейцарияда өзара түсіністік туралы меморандумға қол қоятынын хабарлаған болатын.
Иран Сыртқы істер министрінің орынбасары Казем Гарибабади де келісімге қол қою рәсімі жұма күні өтетінін растады.
Иран мен АҚШ арасындағы меморандум, ең алдымен, әскери қимылдарды тоқтатуды көздейді. Ал Иранның ядролық бағдарламасының болашағы сияқты ең күрделі мәселелерді тараптар кейінгі кезеңдерде талқылайтын болады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
