Алматы базарларында заңсыз әкелінген 13 мыңнан астам тауық жұмыртқасы анықталды
Тәркіленген тауар мал қорымында биотермиялық әдіспен жойылды
Анықталған контарбандалық өнімдер тәркіленіп, санитарлық-эпидемиологиялық ережелерге сәйкес жойылды, деп хабарлайды Kapital.kz іскерлік ақпарат орталығы Сауда және интеграция министрлігінің баспасөз қызметіне сілтеме жасап.
Ведомство мәліметінше, ветеринариялық қауіпсіздікті қамтамасыз ету мақсатында ҚР Ауыл шаруашылығы министрлігі Ветеринариялық бақылау және қадағалау комитетінің Алматы қаласы бойынша аумақтық инспекциясы Сауда және тұтынушылардың құқықтарын қорғау департаментімен, сондай-ақ Қазақстан құс өсірушілер одағымен бірлесіп, қаланың сауда нысандарында кезекті рейд өткізген.
«Барыс-IV» базарын тексеру барысында инспекция мамандары ветеринариялық ілеспе құжаттарысыз, тиісті таңбалаусыз және арнайы қаптамасыз сатылып жатқан тауық жұмыртқаларын анықтады. Заңсыз айналымнан жалпы саны 13 680 жұмыртқа тәркіленді. Қазақстан Республикасының Әкімшілік құқық бұзушылық туралы кодексіне сәйкес тиісті хаттамалар толтырылып, кінәлі тұлғаларға жалпы сомасы 1 297 500 теңге көлемінде айыппұл салынды», делінген ақапаратта.
Алайда ресми ақпаратта жұмыртқалардың нақты қай елден немесе қай өңірден әкелінгені айтылмайды. Министрлік мәліметінше, өнімнің бүкіл партиясы белгіленген ережелер бойынша көмілген.
«Адамдар мен жануарлардың денсаулығына, сондай-ақ қоршаған ортаға қауіп төндіретін тамақ өнімдерін жою қағидаларына (ҚР Үкіметінің № 140 қаулысы) сәйкес, 2026 жылғы 10 маусымда тәркіленген 13 680 жұмыртқа қалалық мал қорымына жеткізіліп, «Беккер шұңқырына» тасталды және биотермиялық әдіспен зарарсыздандырылды, - деп нақтылады Сауда және интеграция министрлігі.
Заңбузушылықтар анықталғаннан кейін мамандар көтерме және бөлшек сауда ұйымдарының басшыларына ветеринариялық-санитарлық талаптарды сақтау бойынша түсіндіру жұмыстарын жүргізді. Сондай-ақ базар әкімшілігіне басқа елдерден заңсыз әкелінген өнімдерді сатуға тыйым салу туралы ресми хаттар жолданды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
