Өзбекстанның әуе компаниясы Қазақстанға жаңа бағыт ашады
Ұшу жиілігі аптасына бір рет деп жоспарланған
Қазақстан мен Өзбекстан арасындағы әуе қатынасы жиілей түспек. Осы жылдың 13 маусымынан бастап көрші елдің «My Freighter» (Centrum Air) әуе компаниясы Қазақстан нарығына шығып, жаңа бағыт бойынша тұрақты рейстерді бастайды, деп хабарлайды Kapital.kz іскерлік ақпарат орталығы Көлік министрлігіне сілтеме жасап.
Ведомство мәліметінше, жаңа әуе қатынасы Ташкент пен Қостанай қалаларын тікелей байланыстырмақ. Бұл екі өңір арасындағы жолаушылар үшін жол уақытын айтарлықтай қысқартуға мүмкіндік береді.
Алғашқы рейс13 маусымнан бастап іске қосылады. Ал ұшу жиілігі аптасына 1 рет — сенбі күндері қатынайды. Жолаушылар жайлылығы жоғары «Airbus 320» лайнерімен тасымалданады деп жоспарланып отыр.
Көлік министрлігі халықаралық ұшу географиясын кеңейту мен рейстер санын арттыру бағытында жүйелі жұмыс жүргізіп жатқанын атап өтті. Жаңа әуе көпірінің ашылуы тек туристер үшін ғана емес, сонымен қатар екі ел арасындағы іскерлік байланысты нығайтуға септігін тигізеді, делінген ақпаратта.
Бұған дейін «FlyOne Armenia» әуе компаниясы Қазақстанға рейстер ашатыны белгілі болды. Армениялық компания аптасына бес рейске дейін орындайды деп жоспарланып отыр.
«ҚазМұнайГаз-Аэро» FlyOne Armenia авиакомпаниясының рейстерін жанармаймен қамтамасыз ететіні хабарланған болатын. Бүгінде Қазақстан Орталық Азияда авиаотынға ең төменгі бағалардың бірін сақтап отыр.
Сонымен қатар 2026 жылы, Көлік министрі Нұрлан Сауранбаев тағы 11 халықаралық маршрутты ашу немесе қайта бастау жоспарланып отырғанын мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
