«FlyOne Armenia» әуе компаниясы Қазақстанға рейстер ашады
Армениялық компания аптасына бес рейске дейін орындайды деп жоспарланған
Биылғы жылдың 12 маусымынан бастап Қазақстанның әуе тасымалы нарығына Арменияның жаңа шетелдік әуе тасымалдаушысы – «FlyOne Armenia» әуе компаниясы қосылды, деп хабарлайды Kapital.kz іскерлік ақпарат орталығы Көлік министрлігіне сілтеме жасап.
«Қазақстан Республикасы Көлік министрлігі ұшу бағыттарының географиясын кеңейту және халықаралық рейстер санын арттыру бойынша жүйелі жұмыс жүргізуде. Осы орайда, ағымдағы жылдың 12 маусымынан бастап Қазақстанның әуе тасымалы нарығына Арменияның жаңа шетелдік әуе тасымалдаушысы – «FlyOne Armenia» әуе компаниясы қосылды», делінген ведомствоның ақпаратында.
Әуе компаниясы Ереван – Алматы бағыты бойынша аптасына 2 рет (дүйсенбі және жұма күндері) тікелей тұрақты жолаушылар рейстерін орындай бастайды. Нәтижесінде Қазақстан мен Армения арасындағы рейстердің жалпы саны аптасына 3 рейстен 5 рейске дейін артады деп жоспарланған.
Қазақстан мен Армения арасындағы жаңа әуе қатынасының ашылуы екі ел арасындағы сауда-экономикалық, іскерлік, инвестициялық, туристік және мәдени ынтымақтастықты одан әрі дамытуға ықпал етеді, деп атап өтті министрліктен.
Еске салсақ, бұған дейін «ҚазМұнайГаз-Аэро» FlyOne Armenia авиакомпаниясының рейстерін жанармаймен қамтамасыз ететіні хабарланған болатын. Бүгінде Қазақстан Орталық Азияда авиаотынға ең төменгі бағалардың бірін сақтап отыр.
Сонымен қатар 2026 жылы, Көлік министрі Нұрлан Сауранбаев тағы 11 халықаралық маршрутты ашу немесе қайта бастау жоспарланып отырғанын мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
