Abu Dhabi Commercial Bank PJSC Қазақстанда жаңа еншілес банк ашуға дайындалып жатыр
Abu Dhabi Commercial Bank (Kazakhstan) әділет органдарында тіркелді
Қаржы нарығын реттеу және дамыту агенттігінің төрайымы Мәдина Әбілқасымова мен Біріккен Араб Әмірліктерінің ең ірі банктерінің бірі — Abu Dhabi Commercial Bank PJSC (ADCB) өкілдерінің кездесуі өтті, деп хабарлайды Kapital.kz іскерлік ақпарат орталығы қаржы реттеушісінің баспасөз қызметіне сілтеме жасап.
Кездесу барысында тараптар «Abu Dhabi Commercial Bank (Kazakhstan)» АҚ-тың құрылуымен іске қосылуының одан әрі кезеңдеріне байланысты мәселелерді, оның ішінде Қазақстан Республикасының заңнамасына сәйкес банктік лицензия алудың ұйымдастырушылық және реттеушілік аспектілерін талқылады.
Бүгінгі күні Қазақстан Республикасының банк секторында 23 банк, оның ішінде 10 еншілес банк жұмыс істейді. Олардың қатарында Abu Dhabi Commercial Bank PJSC еншілес ұйымы болып табылатын «ADCB» Ислам Банкі» АҚ жұмыс істейді.
Abu Dhabi Commercial Bank PJSC (ADCB) Біріккен Араб Әмірліктерінің ең ірі банктерінің қатарына кіреді. Банктің мажоритарлық акционері толығымен Абу-Даби Үкіметіне тиесілі Mubadala Investment Company тәуелсіз инвестициялық қоры болып табылады.Банк жоғары халықаралық кредиттік рейтингтерге ие (S&P «A+», Fitch «A+») және 2026 жылғы 1сәуірдегі жағдай бойынша активтер мөлшері бойынша БАӘ-нің 56 банкініңарасында 3-ші орында.
Өз кезегінде, «ADCB» Ислам Банкі» АҚ Қазақстан Республикасының банк жүйесінде қызметті жүзеге асырады және екінші деңгейдегі 23 банк арасында активтер бойынша 21-ші, депозиттер бойынша 20-шы және кредиттік портфель бойынша 16-шы орында.
2025 жылдың қорытындысы бойынша банктің қаржылық нәтижесі 6,3 млрд теңгені құрады. Банктің қызметі капиталдандырудың жоғары деңгейімен және барлық пруденциялық нормативтердің сақталуымен сипатталады.
Бұған дейін Агенттік Abu Dhabi Commercial Bank PJSC-ке «Abu Dhabi Commercial Bank (Kazakhstan)» АҚ еншілес банкін ашуға, құрылатын банкке қатысты банк холдингі мәртебесін алуға, сондай-ақ еншілес ұйым құруға рұқсат берген болатын.
Банк Қазақстан Республикасының Әділет органдарында 2026 жылғы 20 сәуірде тіркелді. Жаңа банктің ашылуы Қазақстан Республикасының банк секторындағы бәсекелестікті дамытуға, бизнес пен халық үшін қаржылық қызметтер аясын кеңейтуге,сондай-ақ халықаралық банк капиталын тартуға ықпал ететін болады.
Сонымен қатар, жаңа банк «ислам терезесі» тетігі арқылы исламдық қаржыландыруды дамытуды жоспарлап отырғаны атап өтілді, бұл елдің қаржы нарығында баламалы қаржы құралдарының қолжетімділігін кеңейтеді, деп атап өтті агенттікте.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
