Дулат Тастекеев Қазақстанда банк ашуды көздейді
Жаңа қаржы институты шағын және орта бизнесті қолдауға бағытталады
«TAS Finance Group» МҚҰ банк болып қайта құрылмақ. Бұл туралы New Vision 2026 форумында TAS Group иесі әрі бас директоры Дулат Тастекеев мәлімдеді, деп хабарлайды Kapital.kz іскерлік ақпарат орталығының тілшісі.
«Қазіргі уақытта микроқаржы ұйымымызды банкке айналдыру үшін қаржылық реттеушіден рұқсат алу бойынша алғашқы келіссөздер жүріп жатыр. Бұл үдеріске кем дегенде 1,5-2 жыл уақыт керек. Кейбіреулер финтех-компания банкке айналғанда, оның жұмысы баяулап, бюрократияға бой алдырады деп қауіптенеді. Біздің мақсатымыз – банктік лицензия алсақ та, бюрократияға салынған қаржы институтына айналмау», - деді ол.
Ол жаңа банктің негізгі назары шағын және орта бизнеспен жұмыс істеуге аударылатынын қадап айтты.
«Қазір біз шағын және орта бизнеске несиені, соның ішінде кепілді қарыздарды өте жылдам бере аламыз. Бұған жарты-ақ сағат уақыт кетеді. Біз жалақыға дейінгі қысқа мерзімді қарыздармен айналыспаймыз, бізде ипотека мен инвестициялық несиелер де жоқ, өйткені арзан ақша көздеріне қол жеткізе алмай отырмыз. Сондықтан болашақта да осы өз өнімімізге басымдық беретін боламыз», - деп атап өтті Дулат Тастекеев.
Кәсіпкер неліктен мұндай тәсілді таңдады?
«2025 жылдың қорытындысы бойынша Қазақстанның ішкі жалпы өніміндегі шағын және орта бизнестің үлесі 40%-ды құрады. ШОБ саласында 4 миллионға жуық адам еңбек етеді — бұл елдегі белсенді халықтың қақ жартысына жуығы. Әрине, біз шағын және орта бизнестің ішкі жалпы өнімдегі үлесі 60-80%-ға жеткенін қалаймыз, уақыт өте келе бұған да қол жеткіземіз…», - деді кәсіпкер.
Сондай-ақ ол егер өзгерістен кейін банктің жұмысы баяулап кетсе, бұл «сәтсіз трансформация» болатынын айтып, сөзін түйіндеді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
