- Басты бет
- Экономика
- «ҚазМұнайГаз-Аэро» FlyOne Armenia авиакомпаниясының рейстерін жанармаймен қамтамасыз етеді
«ҚазМұнайГаз-Аэро» FlyOne Armenia авиакомпаниясының рейстерін жанармаймен қамтамасыз етеді
Қазақстан Орталық Азияда авиаотынға ең төменгі бағалардың бірін сақтап отыр
«ҚазМұнайГаз-Аэро» ЖШС мен FlyOne Armenia авиакомпаниясы Алматы халықаралық әуежайында әуе кемелеріне жанармай құю қызметін көрсету туралы келісімшартқа отырды. Бұл туралы Kapital.kz іскерлік ақпарат орталығы «ҚазМұнайГаз» АҚ баспасөз қызметіне сілтеме жасап хабарлайды.
FlyOne Armenia авиакомпаниясы «Ереван – Алматы – Ереван» бағытындағы тұрақты жолаушылар рейсін ашады. «ҚМГ-Аэро» Алматы әуежайында бұл рейстерді халықаралық қауіпсіздік пен сапа стандарттарына сай авиаотынмен толық қамтамасыз етеді.
«FlyOne Armenia компаниясының отандық нарыққа шығуы халықаралық әуе тасымалдаушыларының Қазақстанмен әуе қатынасын дамытуға деген қызығушылығы артқанын көрсетеді. Сондай-ақ Қазақстан Орталық Азияда авиация отынының ең төмен бағасын сақтап отыр. Бұл ел әуежайлары арқылы транзиттік, жолаушылар және жүк рейстерінің көбеюіне септігін тигізеді», - делінген ақпаратта.
Еске сала кетейік, осы жылдың ақпан айында «ҚазМұнайГаз-Аэро» тайландық Thai AirAsia X авиакомпаниясының ұшақтарына жанармай құя бастаған болатын.
Бұған дейін компания оңтүстік астана әуежайында Turkish Airlines, SpaceBee Airlines, AZAL Azerbaijan Airlines, My Freighter Airlines және Easy Charter авиакомпанияларымен де ұшақтарға жанармай құю туралы келісімшарттар жасасқан еді. Сонымен қатар, Қазақстанда ұлттық жүк әуе тасымалдаушысы іске қосылатыны хабарланған болатын. Бұдан бөлек, «ҚазМұнайГаз-Аэро» Ақтөбе әуежайында құны 5 млрд теңге болатын отын құю кешенін салмақ.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
