Қазақстанда онлайн-сатып алуларды декларациялау қажет болады
Мәжіліс кеден заңнамасына енгізілетін түзетулерді қолдады
Депутаттар «Қазақстан Республикасындағы кедендік реттеу туралы» Кодекске өзгерістер енгізу туралы заң жобасын бірінші оқылымда мақұлдады. Құжат азаматтардың шетелдік интернет-алаңдардан сатып алатын тауарларын ресімдеу ережелерін жетілдіруге бағытталған, деп хабарлайды Kapital.kz іскерлік ақпарат орталығы.
Ұлттық экономиканың бірінші вице-министрі Азамат Амрин хабарлағандай, заң жобасында мұндай сатып алуларды дербес санатқа – электрондық сауда тауарларына бөлу қарастырылған. Сонымен қатар, заңнамада жаңа ұғымды – «электрондық сауда операторын» бекіту, сондай-ақ кедендік құжаттың жеке түрі – «электрондық сауда декларациясын» енгізу ұсынылады.
Вице-министрдің айтуынша, қазіргі уақытта жеке тұлғалардың шетелдік маркетплейстер арқылы тапсырыс берген тауарлары жеке пайдалануға арналған тауарлар санатына жатады. Оларды декларациялау бажсыз әкелудің белгіленген нормаларынан асқан жағдайларда ғана жүзеге асырылады.
«Бұл ретте электрондық сауда тауарлары тек қана жеке тұлғалардың жеке пайдалануына арналған және кәсіпкерлік қызметті жүзеге асыруға арналмаған. Сонымен бірге, аталған тауарлар ресми статистикаға енбейді, өйткені олар сауда айналымына жатпайды. Электрондық сауда тауарларының бүкіл көлемін декларациялау шетелдік интернет-алаңдарда сатып алынатын тауарлардың толық статистикасын қалыптастыруға мүмкіндік береді», – деп атап өтті Азамат Амрин мәжілістің жалпы отырысында.
Ұлттық экономика министрлігі ұсынылып отырған өзгерістер кедендік ресімдеу процедураларын азаматтар үшін ыңғайлырақ етуге мүмкіндік береді, трансшекаралық электрондық сауданың ашықтығын арттырады және мемлекетті шетелдік онлайн-платформалар арқылы сатып алынатын импорттық тауарлардың көлемі туралы толық ақпаратпен қамтамасыз етеді деп есептейді.
Бұған дейін интернет-сатып алуларды кедендік ресімдеу ережелеріндегі алдағы өзгерістер туралы Мемлекеттік кірістер комитеті хабарлаған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
