Президент қазақстандық бизнесті Алатауға ақша салуға шақырды
Қасым-Жомарт Тоқаев отандық олигархтар мен бизнеске үндеу жасады
Қазақстан президенті Қасым-Жомарт Тоқаев отандық бизнесті Алатау қаласын дамытуға қатысуға шақырды, деп хабарлайды Kapital.kz іскерлік ақпарат орталығының тілшісі Ақордаға сілтеме жасап.
Президент отандық бизнес өкілдері қаланы дамытудың бел ортасында жүруі қажет екенін айтты.
«Маған бүгінде 50-ден астам инвестициялық жобадан тұратын пул жасақталғаны жөнінде мәлімдеді. Жалпы көлемі екі триллион теңгеге жуық қаржы құйылған бастамалар аясында 50 мыңнан аса жұмыс орны ашылады. Алдағы бір-екі жыл ішінде басым салаларға инвесторлар тарта отырып, аталған портфельді кеңейте түсуіміз керек», деді Мемлекет басшысы Алатау қаласын дамыту жөніндегі кеңесте сөйлеген сөзінде.
Әсіресе, оның пікірінше, отандық бизнесті ынталандыруға баса назар аударылғаны жөн. Бизнес өкілдері сырттан бақылаушы болмай, қаланы дамытудың бел ортасында жүруі қажет.
«Мұның маңызы зор. Өйткені, Шэньчжэнь секілді қалалардың тәжірибесі алғашқы онжылдықта шаһардың өркендеуіне жұмсалған инвестицияның басым бөлігін сыртқы емес, ішкі салымдар құрағанын көрсетіп отыр. Шэньчжэнь, Хайнань, Дубай, Сингапур сияқты қалалардың бәрінде мемлекет алғашқы инвестор ретінде базалық инфрақұрылым қалыптастырып берді. Осылайша, бизнесте тәуекел азайып, тиісті жағдай жасалатын орнықты инвестициялық цикл іске қосылды», деп қосты президент.
Бұған дейін Қасым-Жомарт Тоқаев Alatau City-ді қарқынды дамыту: аңнамалық жұмыстарды тездетуді тапсырған болатын. Мемлекет басшысы жаңа қаланың дамуы үшін құқықтық базаны бір жыл ішінде қалыптастыру қажет екенін айтты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
