Теңіздегі өндіріс өткен аптадағы іркілістен кейін қалпына келу сатысында – ТШО
Кен орны операторының нысандарының бірінде «болмашы операциялық іркіліс» орын алды
Қазақстандағы ең ірі Теңіз кен орнында 28 мамырда болған өндірістік іркілістен кейін мұнай өндіру қалпына келу сатысында, деп хабарлады «Интерфакс-Казахстан» агенттігі «Теңізшевройл» (ТШО) баспасөз қызметіне сілтеме жасап.
«Қазіргі уақытта ТШО-да өндіріс қалпына келу сатысында», - деп жауап берді ТШО агенттіктің Теңіздегі мұнай өндіру бүгінгі таңда толық қалпына келді ме деген сауалына.
Кен орнының операторы 2026 жылғы 28 мамырда кен орнындағы нысандардың бірінде «болмашы операциялық іркіліс» орын алғанын еске салды. Өзге мәліметтерді ТШО түсіндірмеді.
Қазақстанның Энергетика министрлігі бұған дейін Теңіз кен орнындағы операциялық іркіліс мұнай өндірудің уақытша төмендеуіне әкеліп соқтырғанын, ТШО қажетті жедел шараларды қабылдап жатқанын атап өткен болатын.
Бұған дейін хабарланғандай, 2026 жылғы 18 қаңтарда Теңіз кен орнында трансформаторлардың өртенуі орын алып, келесі күні «Теңізшевройл» электр энергиясын бөлу жүйелеріндегі проблемаларға байланысты Теңіз және Королевское кен орындарында мұнай өндіруді уақытша тоқтатқан еді. Королевское кен орнында өндіріс 26 қаңтарда, ал Теңізде 31 қаңтарда қайта басталды. Қазақстанның энергетика министрі Ерлан Ақкенженов осы оқиғадан кейін 11 наурызда Теңізде өндірістің толық қалпына келгені туралы мәлімдеді.
Бұл оқиға 2026 жылдың І тоқсанында кен орнындағы өндіріс қарқынына әсер етті. Сонымен, өндіріс өткен жылдың сәйкес кезеңімен салыстырғанда 1,6 есе төмендеп, 5,7 млн тоннаны құрады.
Теңіздегі мұнай қоры - 3,1 млрд тонна. «Теңізшевройл» ЖШС қатысушылары Chevron corp. (50%), ExxonMobil Kazakhstan Ventures Inc (25%), «ҚазМұнайГаз» арқылы Қазақстан (20%), «ЛУКОЙЛ» (5%).
Бұған дейін Энергетика министрлігі Теңіздегі іркіліс мұнай өндірудің төмендеуіне әкелгенін хабарлаған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
