Cargolux әуе алпауыты Қазақстан нарығына қайта оралады
1 маусымнан бастап люксембургтік жүк тасымалдаушы Астана арқылы аптасына 14 рейске дейін орындайды
Әлемдегі ең ірі жүк авиакомпанияларының бірі – Cargolux Airlines International S.A. Қазақстан нарығына қайта оралады. 2026 жылғы 1 маусымнан бастап компания Астана халықаралық әуежайы арқылы аптасына 14 рейске дейін орындауды жоспарлап отыр. Бұл туралы келісімдер Қазақстанның Бельгиядағы елшісі Роман Василенко мен авиакомпания басшысы Ричард Форсонның кездесуі барысында расталды, деп хабарлайды Kapital.kz іскерлік ақпарат орталығы сыртқы істер министрлігінің баспасөз қызметіне сілтеме жасап.
«Қазақстан өзінің транзиттік-көлік әлеуетін нығайтуға қомақты инвестиция салды. Cargolux Азия мен Еуропа арасындағы көлік бағыттарын дамытуға әрі Орта дәліз бағыттарында маңызды серіктес ретінде Қазақстанмен ынтымақтастықты күшейтуге мүдделі», – деді компанияның президенті әрі бас директоры Ричард Форсон.
Роман Василенко Cargolux-тің қайта оралуы Қазақстанның Еуропа мен Азия арасындағы маңызды логистикалық және авиациялық хаб ретіндегі транзиттік тартымдылығының артып келе жатқанын дәлелдейтінін атап өтті.
Cargolux Airlines International S.A. – Люксембургтің ең ірі жүк авиакомпаниясы және Еуропадағы жетекші жүк тасымалдаушыларының бірі. Компания 1970 жылы құрылған, штаб-пәтері Люксембургте орналасқан. Әуе тасымалдаушы Еуропа, Азия, Солтүстік және Оңтүстік Америка, Африка мен Таяу Шығыстағы 90-нан астам бағыт бойынша тұрақты және чартерлік жүк рейстерін орындайды. Әуе паркінің негізін бір рейсте 130 тоннадан астам жүк тасымалдай алатын заманауи Boeing 747 Freighter жүк ұшақтары құрайды. Қазіргі уақытта компания Boeing 747 ұшағының түрлі модификациясындағы 30 жүк әуе кемесін пайдаланады және әлемнің 50-ден астам елінде 85-тен аса өкілдік желісіне ие.
Еске салайық, Vietjet лоукостері Алматыдан Ханой мен Прагаға жаңа тікелей рейстер ашылатынын ресми түрде жариялады. Жаңа бағыттар Қазақстанды Вьетнам және Чехиямен байланыстырып қана қоймай, қазақстандық жолаушыларға әлемнің 20 еліндегі 186-дан астам бағытқа ыңғайлы түйісу рейстерін пайдалануға мүмкіндік береді.
Қазақстан мен АҚШ арасындағы тікелей әуе қатынасын 2027 жылдан ерте ашу жоспарланып отырған жоқ. Air Astana компаниясы бұл бағытты іске қосуға бірқатар сыртқы факторлар кедергі келтіріп отырғанын түсіндірді. Ал Қазақстан мен Жапония арасындағы тікелей әуе рейстерін 2026 жылдың төртінші тоқсанында ашу жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
