• Басты бет
• Экономика
• Almaty Superski жобасы экологиялық талаптар қатаң сақталған жағдайда ғана жүзеге асырылуы мүмкін – вице-премьер

Almaty Superski жобасы экологиялық талаптар қатаң сақталған жағдайда ғана жүзеге асырылуы мүмкін – вице-премьер

Көкжайлау жерлері ерекше қорғаудағы Іле-Алатауы ұлттық паркінің құрамынан шығарылмайды

Премьер-министрдің орынбасары – мәдениет және ақпарат министрі Аида Балаева Almaty Superski жобасының қауіпсіздік, экология және инфрақұрылым сапасына қойылатын заманауи талаптарды ескере отырып, Қазақстанның туризм саласын дамытудағы маңызын атап өтті, деп хабарлайды Primeminister.kz.

Аида Балаева бүгінде туризм жұмыспен қамтуға, шағын және орта бизнестің дамуына, инвестицияға, сервиске және елдің халықаралық имиджіне ықпал ететін стратегиялық маңызды салалардың біріне айналып отырғанын айтты. 2024 жылы Қазақстанға 15,3 млн адам келген, ал ішкі туристер саны 10,5 млн адамды құрап, бір жыл бұрынғыдан 900 мыңға артқан. Бұл көрсеткіштер туризмнің экономиканың нақты өсу нүктесіне және елді әлемге танытудың маңызды құралына айналып келе жатқанын көрсетеді.

Соңғы жылдары табиғи, экологиялық және тау туризміне қызығушылық ерекше артқан. Тек 2024 жылдың өзінде Қазақстанның ұлттық парктеріне 2,8 млн адам барған, бұл 2023 жылмен салыстырғанда 18%-ға көп.

«Бұрын мұндай демалысты көбіне тәжірибелі туристер мен тау шаңғысын сүйетіндер таңдаса, бүгінде табиғи аумақтар жаппай баратын орынға айналды. Адамдар ол жерлерге отбасымен, балаларымен, демалыс күндері жаяу серуендеуге, белсенді демалысқа және табиғат аясындағы қысқа сапарларға барады», – деді Аида Балаева.

Тау туризмін дамыту инфрақұрылымға жаңа көзқарасты талап етеді

Сонымен қатар туристер ағынының артуы заманауи әрі уақтылы инфрақұрылымсыз реттелмеген туризмге әкеліп, табиғатқа түсетін жүктемені күшейтіп, адамдардың қауіпсіздігіне қауіп төндіреді. Туризм – экономика, мәдениет, қауіпсіздік және бизнес тоғысатын кешенді сала. Тау шаңғысы туризмін дамыту Алматы тау кластеріне жаңа көзқарас пен заманауи тәсілді қажет етеді.

«Мемлекет басшысы Қасым-Жомарт Тоқаев туризм – экономика, мәдениет, қауіпсіздік пен бизнес тоғысқан күрделі сала екенін ерекше атап өтті. Президент тау шаңғысы туризмін дамыту туралы айта отырып, Алматы тау кластеріне жаңа көзқарас қажеттігін айтты. Сондықтан Almaty Superski жобасын дәл осы тұрғыда қарастыру қажет. Бұл жекелеген инфрақұрылым нысандарын салу мәселесі ғана емес. Бұл – Алматының болашағы, Қазақстан туризмінің дамуы, азаматтардың тауға қолжетімділігі, адамдардың қауіпсіздігі және Іле Алатауы табиғатына жауапкершілікпен қарау туралы әңгіме», – деді вице-премьер – мәдениет және ақпарат министрі.

Almaty Superski жобасының маңызы бір қаланың шеңберінен шығып, Қазақстанның заманауи, ашық және бәсекеге қабілетті туристік бағыт ретіндегі халықаралық имиджін нығайтуға ықпал етеді.

«Бүгінде даму мен экологияны бір-біріне қарсы қоюға болмайды. Жауапты мемлекет табиғатты қорғаумен қатар инфрақұрылым құрып, адамдардың қауіпсіздігін қамтамасыз етіп, азаматтарға жаңа мүмкіндіктер ашуы тиіс. Almaty Superski Қазақстанның бірегей табиғи ресурстарын қоғам, мемлекет және болашақ ұрпақ мүддесі үшін өркениетті, қауіпсіз әрі ұқыпты пайдалана алатынының үлгісіне айналуы керек», – деді Аида Балаева.

Ол заманауи инфрақұрылым ережелер, лимиттер, ойластырылған бағыттар, экологиялық мониторинг пен мінез-құлық мәдениеті арқылы табиғатқа түсетін салмақты азайтуы тиіс екенін айтты.

Сондай-ақ вице-премьер Көкжайлау жерлері Іле-Алатауы мемлекеттік ұлттық табиғи паркі құрамынан шығарылмайтынын және ерекше қорғалатын табиғи аумақ мәртебесін сақтайтынын атап өтті. Бұдан бөлек, жоба аясында жеке коттедждер мен виллалар салу қарастырылмаған. Жобаны іске асыру экологиялық талаптар қатаң сақталған, ғылыми сүйемелдеу, қоғамдық бақылау және орындаушылардың жеке жауапкершілігі болған жағдайда ғана мүмкін.

Almaty Superski нақты ережелері бар қоғамдық инфрақұрылым ретінде дамуы тиіс

Аида Балаеваның айтуынша, Almaty Superski жобасы балаларымен келетін отбасылар, егде жастағы адамдар және қозғалысы шектеулі азаматтарды қоса алғанда, түрлі санаттағы адамдар үшін тауға бару мүмкіндігін кеңейте алады. Ол үшін аспалы жолдар, қауіпсіз бағыттар, визит-орталықтар, шолу алаңдары және негізгі санитарлық инфрақұрылым қажет. Жоба жабық курорт емес, қоғамдық инфрақұрылым ретінде жұмыс істеуі керек. Сонымен қатар Медеу – Шымбұлақ – Көкжайлау – Құмбелдің бірыңғай жүйесі туристік ағынды бөліп, Шымбұлаққа түсетін жүктемені азайтуға мүмкіндік береді.

«Біз үшін тұрғындардың, экологтардың, сарапшылардың және азаматтық қоғам өкілдерінің пікірін есту маңызды. Бірақ талқылау фактілерге, ғылыми сараптамаға және Алматы мен бүкіл елдің ұзақмерзімді мүдделерін түсінуге негізделуі тиіс», – деді вице-премьер – мәдениет және ақпарат министрі.

Алматы тау кластерін дамыту заң талаптарын сақтау, аумақтың табиғатты қорғау мәртебесін сақтау, шешімдердің ашықтығы мен экологиялық талаптарды орындау жағдайында ғана мүмкін екені айтылды. Almaty Superski жобасы нақты ережелері, бақылауы және қоғамдық мүддені ескеретін реттелетін инфрақұрылым ретінде жүзеге асырылуы тиіс.

Еске салсақ, 2025 жылдың күзінде Kazakh Tourism Development Ltd. директорлар кеңесі тау шаңғысы туризмін дамытуға арналған Almaty Superski жобасының жаңартылған мастер-жоспарын бекіткен болатын. Ал Бәйтерек холдингі Almaty Superski тау шаңғысы курортын құру жобасының операторы атанды. Жоан Виладомат Almaty Superski тұжырымдамасын таныстырған еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз