«Бақты» кеден бекетін жаңғырту жұмыстары биыл аяқталады
Қазіргі таңда нысанның құрылыс дайындығы шамамен 70%-ды құрайды
Абай облысының әкімі Берік Уәли Мақаншы ауданындағы «Бақты» кеден бекетін қайта жаңғырту жұмыстарының барысымен танысты, деп хабарлайды Kapital.kz іскерлік ақпарат орталығы Абай облысы әкімдігінің баспасөз қызметі сілтеме жасап.
Кеден бекеті Қытаймен шекарада орналасқан және халықаралық көлік-логистика бағытының маңызды нысандарының бірі саналады. Қытай жағындағы оған сәйкес өткізу пункті – «Покиту».
Кеден бекетін қайта жаңғыртудың негізгі мақсаты – өткізу қабілетін арттыру, кедендік рәсімдерден өту уақытын қысқарту және Қазақстан мен Қытай арасындағы көлік-логистикалық әлеуетті дамыту.
Жоспар бойынша құрылыс жұмыстары биылғы жылдың екінші жартыжылдығында толық аяқталады. Қазіргі таңда нысанның құрылыс дайындығы шамамен 70%-ды құрайды.
Сондай-ақ 2024 жылы «Бақты» кеден бекетінде жеке тұлғалардың туристік мақсатта кедендік шекарадан өтуі үшін уақытша модульдік жолаушылар терминалы ашылғаны еске салынды. Қазіргі уақытта өткізу пункті арқылы күн сайын орта есеппен 6–8 автобус және 300-350 жолаушы өтеді.
Бұдан бөлек, бекетте екі жаңа инспекциялық-тексеру кешені жұмыс істейді. Бұл кедендік бақылаудың тиімділігін арттырып, көлік құралдарын рәсімдеу процесін едәуір жеделдетуге мүмкіндік береді.
Бүгінде Қытай Халық Республикасынан Қазақстанға күн сайын шамамен 150 автокөлік кірсе, Қазақстаннан Қытайға 250-ге жуық автокөлік шығады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
