Ылғал тапшылығы мен құрғақшылық қаупі: Биыл қай облыстарда жауын-шашын аз болады?
Министрлік биылғы вегетациялық кезеңдегі ылғал тапшылығы мен температуралық тәуекелдерді атады
Биылғы Қазақстанда көктемгі егіс жұмыстары кезеңінде топырақ ылғалдылығы бойынша жағдай жалпы қолайлы. Алайда елдің жекелеген аудандарында қуаңшылық болуы мүмкін. Бұл туралы бүгін Үкімет отырысында Экология және табиғи ресурстар министрі Ерлан Нысанбаев мәлімдеді, деп хабарлайды Kapital.kz іскерлік ақпарат орталығының тілшісі.
Министрдің сөзінше, Қостанай, Ақмола, Солтүстік, Шығыс және Батыс Қазақстан облыстарында топырақтың метрлік қабатында ылғал қоры негізінен қанағаттанарлық және оңтайлы болады. Ал Ақтөбе, Павлодар және Қарағанды облыстарында – қанағаттанарлық деп бағаланып отыр.
«Бұл ретте ауа температурасының жоғары болуына байланысты топырақтың үстінгі қабатының тез кебу қаупі бар. Сондықтан жекелеген аудандарда жергілікті ылғал тапшылығы болуы мүмкін. Мәселен, Ақтөбе облысының Шалқар және Жамбыл облысының Қордай аудандарының жайылымдарында құрғақшылық қалыптасуы ықтимал. Ауа райы болжамына сәйкес, мамыр айында ауа температурасы нормадан 1-2 градусқа жоғары болады деп күтілуде», деді ведомство басшысы.
Сонымен қатар ол жауын-шашын бойынша жағдай елдің басым бөлігінде мөлшері норма шамасында болатынын атап өтті. Тек Қазақстанның орталық және оңтүстік-батыс өңірлерінде жауын-шашын аз болады деп болжанған. Бұл Қарағанды, Түркістан, Жамбыл облыстарының басым бөлігі, Қостанай, Ақтөбе және Ақмола өңірлерінің оңтүстік аудандары, сондай-ақ Ұлытау және Қызылорда облыстары.
«Жалпы мамыр айында ауа райы егін егу жұмыстарын жүргізуге қолайлы болады. Маусым айында ел аумағының басым бөлігінде температура нормадан 1-2 градусқа жоғары болады деп күтілуде. Бұл ретте республиканың шығысы мен оңтүстік-шығысында, атап айтқанда Шығыс Қазақстан және Алматы өңірлерінде, Абай және Жетісу облыстарында, сондай-ақ Павлодар, Қарағанды облыстарының шығыс жартысында және Жамбыл облысының оңтүстік-шығысында температура норма шегінде болжанады. Елдің астықты өңірлерінің басым бөлігінде жауын-шашын норма шамасында күтіледі», деп қосты Ерлан Нысанбаев.
Бұған қоса министр маусым айында Ұлытау, Ақтөбе облыстары, Қостанай облысының оңтүстігі, Түркістан облысының солтүстігі және Батыс Қазақстан өңірінің оңтүстік-шығысында жауын-шашын болмауы мүмкін екенін атап өтті.
Ал шілде айында Қазақстан аумағының басым бөлігінде ауа температурасы норма шегінде күтіледі. Оның ішінде синоптиктер шығыс өңірлерде жауын-шашын нормадан көп, ал солтүстік және орталық өңірлерде негізінен норма шамасында болса, елдің батысында болжам бойынша жауын-шашын нормадан аз болады деп отыр.
Сала басшысы жалпы вегетациялық маусымның басталуы егін егу жұмыстарын жүргізуге және өнім қалыптастыруға қолайлы деп бағаланатынын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
