• Басты бет
• Экономика
• Кәсіпкер Шахмұрат Мүтәліптің Nature Energy Solutions Ltd компаниясы AIX арқылы 1,2 млрд доллар тартуды жоспарлап отыр

Кәсіпкер Шахмұрат Мүтәліптің Nature Energy Solutions Ltd компаниясы AIX арқылы 1,2 млрд доллар тартуды жоспарлап отыр

Облигациялар 8% купондық мөлшерлемемен шығарылып, 20 мамырдан бастап саудаға түседі

Кәсіпкер Шахмұрат Мүтәліпке тиесілі Nature Energy Solutions Ltd компаниясы AIX биржасында облигациялар орналастыру арқылы 1,2 млрд доллар тартуды жоспарлап отыр. Бұл туралы компания AIX-ке хабарлаған, деп жазады Kapital.kz іскерлік ақпарат орталығының тілшісі.

Компанияның облигациялары 2026 жылғы 18 мамырда AIX алаңында листингтен өтті.

«Бір облигацияның номинал құны 1 мың долларды құрайды, купондық мөлшерлеме – жылдық 8%. Купондық төлем облигация өтелген кезде жүзеге асырылады. Барлығы 1,2 млн дана облигация шығарылады. Бағалы қағаздармен сауда-саттық 2026 жылғы 20 мамыр, сәрсенбі күні басталады», – делінген компания хабарламасында.

Nature Energy Solutions Ltd – Астана халықаралық қаржы орталығы алаңында 2024 жылғы 28 қарашада тіркелген жеке компания. Ол табиғи газды көтерме саудамен айналысады. АХҚО-ның тәуелсіз реттеушісі AFSA деректеріне сәйкес, компанияның жалғыз иесі әрі CEO-сы – Шахмұрат Мүтәліп.

2026 жылғы ақпанда швейцариялық Glencore Plc тау-кен компаниясы «Қазцинк» ЖШС-нің 70% үлесін Шахмұрат Мүтәліпке сатуы мүмкін екені белгілі болған еді.

Bloomberg дереккөздерінің хабарлауынша, мәміле көлемі шамамен 4-4,5 млрд долларды құрауы ықтимал. Келіссөздер аясында Glencore сатып алуды қаржыландыруға қатысуы мүмкін екені, оның орнына өндірілетін өнімді өткізу құқығын алатыны айтылған. Сондай-ақ компания алтын сатудан белгілі бір табыс үлесін сақтап қалуды көздеп отырғаны хабарланды.

Бұған қоса, Шахмұрат Мүтәліп Eurasian Resources Group және алтын өндіруші Altynalmas компанияларындағы үлесті сатып алу бойынша да келіссөздер жүргізіп жатқаны айтылған. Қаржыландыруда Glencore қатысуы мүмкін.

Шахмұрат Мүтәлі бұған дейін Integra Construction KZ құрылыс тобының бас директоры қызметін атқарған. 2025 жылғы қазаннан бастап «Атамекен» ҰКП президиумының құрылыс және ТКШ комитетін басқарады. 2024 жылғы ақпаннан бері Қазақстан бокс федерациясын басқарып келеді.

«Қазцинк» ЖШС – Қазақстандағы түсті металлургия саласындағы ірі кәсіпорындардың бірі. Компания мырыш, қорғасын, мыс, алтын және күмісті толық өндірістік цикл бойынша өндіреді. Оның кәсіпорындары Шығыс Қазақстан, Ақмола және Ұлытау облыстарында орналасқан.

Glencore International AG – «Қазцинктің» негізгі инвесторы болып табылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз