Астанада 20-ға жуық магистральды су құбыры салынады
Елордадағы жерүсті ағын суларын бұру аумағы 20,1 мың гектарға дейін кеңейтілді
Астанада ауыз су тапшылығын болдырмау үшін өткен жылы станцияларға бастапқы суды тәулігіне 50 мың м³ көлемінде жеткізетін техникалық су құбырын салу басталды. Бұл туралы Астана әкімі Жеңіс Қасымбек мәлімдеді, деп хабарлайды Kapital.kz іскерлік ақпарат орталығы.
Жеңіс Қасымбектің мәліметінше, 2025 жылы елордада 3,2 км құбыр салынса, биылғы 5 айда – 5,8 км салынған. Бұған дейін, 2023 жылы үшінші сорғы-сүзгі станциясының (ССС-3) жұмысы іске қосылған болатын.
«Алдағы жылдары магистральды су құбыры желілерін салу бойынша шамамен 20 жобаны іске асыру қажет. Қаланың дамуы мен су тұтыну көлемінің артуын ескерер болсақ, аталған жобаларды жүзеге асыру елорданы сенімді әрі үздіксіз сумен қамтамасыз етуге мүмкіндік береді», деп жазды ол.
Сонымен қатар ол елорданың су бұру жүйесіне тоқталып, былтыр шаруашылық-тұрмыстық кәріз желілерінің 10 шақырымы және кәріз-сорғы станциясын салу бойынша 2 жоба толық аяқталғанын атап өтті. Биыл 2 кәріз-сорғы станциясын салу бойынша 2 жобаны аяқтау жоспарланып отыр.
«Қазіргі уақытта орташа су бұру көлемі – 350-360 мың м³/тәулік (жыл сайынғы өсім шамамен 10 мың м³/тәулік) деңгейінде. Ағынды сулар қолданыстағы кәріз-тазарту құрылыстары (КТҚ) арқылы тазартылады. Қуаттылығын арттыру мақсатында биыл тәулігіне 188 мың м³ өнімділікке ие КТҚ-2 нысаны және оған кіретін-шығатын коллекторлар құрылысы басталады. Сонымен қатар Көктал, Өндіріс елді мекендерінде және Индустриялық парк аумағында жалпы өнімділігі тәулігіне 85 мың м³ болатын жергілікті тазарту құрылысын (ТҚ) жобалау жұмысы жүргізілуде, сондай-ақ қолданыстағы КТҚ-1 нысанын жаңғырту арқылы оның өнімділігін тәулігіне 25 мың м³-ге арттыру жоспарланып отыр», деп қосты Қасымбек.
Әкімнің айтуынша, елорданың нөсерлі кәріз жүйесі 20 тазарту құрылысы мен бір жинақтау тоғанынан, сондай-ақ 621 км болатын магистральдық коллектордан, нөсерлі, дренажды және арық-науалы кәріз желілерінен құралады. Олар 20,1 мың гектардан астам аумақтың жерүсті ағын суларын бұруға мүмкіндік береді.
«Соңғы жылдары нөсерлі, дренажды және арық-науалы кәріз жүйелерінің магистральдық коллекторлары бойынша 22 км-ден астам желі салынып, қайта жаңғыртылды, сондай-ақ 9 сорғы станциясы мен 6 тазарту құрылысы іске қосылды», деді Жеңіс Қасымбек.
2025 жылы Астанада 5 нысан бойынша құрылыс жұмысы аяқталды. Олардың ішінде Қорғалжын тас жолының солтүстігі, ТҚ III-6-ға №2 коллектор (Ильинка елді мекені), II-4 ауданындағы (Мыңжылдық) ТҚ және т.б. Нәтижесінде жүргізілген шаралар арқылы жерүсті ағын суларын бұру аумағы 16,7 мың гектардан 20,1 мың гектарға дейін кеңейтілді.
Қазір Триатлон паркі ауданындағы ТҚ 1-4 және Ақжол көшесі бойындағы ТҚ 6-1 тазарту құрылысын салу және кеңейту жұмысы жүріп жатыр. Бұл жобаларды іске асыру Алматы мен Байқоңыр аудандарындағы бірқатар көше мен жолды су басу қаупін азайтады, деп атап өтті елорда әкімі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
