Кәсіпкер Сұлтан Исин АХҚО-да жаңа компания тіркеді
Arlanex Rail Ltd «машиналар мен жабдықтарды жалға беру» қызметімен айналысады
TRANZIT TRANS LOGISTICS логистикалық компаниясының тең иесі Сұлтан Исин Астана халықаралық қаржы орталығы алаңында Arlanex Rail Ltd компаниясын тіркеді, деп хабарлайды Kapital.kz іскерлік ақпарат орталығының тілшісі AFSA-ға сілтеме жасап.
Компания АХҚО алаңында 2026 жылғы 13 сәуірде тіркелген. Оның қызметі «машиналар мен жабдықтарды жалға беру» деп көрсетілген. CEO ретінде Асқар Бермағамбетов көрсетілген.
Еске салайық, Сұлтан Исин 2026 жылғы 16 сәуірге дейін «TRANZIT TRANS LOGISTICS» ЖШС-нің жалғыз қатысушысы болған. Кейін бұл компанияның құрылтайшылары қатарына өзінің Turlov Private Holding Ltd. жеке компаниясы арқылы Тимур Турлов кірді. Кәсіпкер аталған логистикалық активтің 60%-ын сатып алған. Мәміле нәтижесінде Сұлтан Исиннің үлесі 40%-ға дейін төмендеді.
2026 жылғы 6 мамырда Тимур Турлов осы компаниядағы үлесін 60%-дан 30%-ға дейін азайтқаны белгілі болды. Ол TRANZIT TRANS LOGISTICS-тегі үлесінің үштен бірін Асқар Таштитовке сатты.
«TRANZIT TRANS LOGISTICS» ЖШС — 2013 жылы құрылған көлік-логистика компаниясы. Ол жылжымалы құрамды жалға беру және Қазақстан аумағында әрі халықаралық бағыттарда теміржол тасымалдарын ұйымдастыруға маманданған. Компания паркінде 1 700-ден астам жылжымалы құрам бірлігі бар. Оның ішінде 635 жартылай вагон, 450 жабық вагон, 403 мамандандырылған цистерна (соның ішінде күкірт қышқылын тасымалдауға арналған), 65 мұнай цистернасы, 70 цемент тасымалдайтын хоппер және 25 фитингтік платформа (контейнер тасымалдаушы), сондай-ақ вагондардың өзге де түрлері бар.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
