• Басты бет
• Мемлекет
• «Газпром» мен «Нафтогаз» дауына қатысты АХҚО шешіміне Қазақстанның қатысы жоқ – Әділет министрлігі

«Газпром» мен «Нафтогаз» дауына қатысты АХҚО шешіміне Қазақстанның қатысы жоқ – Әділет министрлігі

Коммерциялық дауларды қарауда АХҚО соты өз регламенті мен халықаралық нормаларды басшылыққа алады

Қазақстан Республикасы Әділет министрлігі Астана халықаралық қаржы орталығы соты Қазақстанның сот жүйесіне кірмейтінін мәлімдеді.

Бұған дейін Астана халықаралық қаржы орталығы соты украиналық Нафтогаз компаниясына Газпромнан 1,4 млрд доллар өндіріп алуға рұқсат бергені хабарланған болатын.

Даниель Ваисов редакция жолдаған сауалға жауап бере отырып, бұл мәселеге Қазақстан Республикасының ешқандай қатысы жоқ екенін айтты.

«Астана халықаралық қаржы орталығының соты мемлекеттік орган да, Қазақстан Республикасының сот жүйесінің бөлігі де емес. Құқықтық тұрғыдан ол экстерриториялық мәртебеге ие. Коммерциялық дауларды қарау кезінде бұл ұйым біздің ұлттық заңнамаға емес, өзінің регламенті мен халықаралық ережелерге сүйенеді», – деді Даниель Ваисов.

Ол сот дауының мәніне де тоқталып, АХҚО сотында істің мазмұны бойынша қаралмағанын атап өтті. Оның айтуынша, сөз Швейцарияда шығарылған арбитраж шешімін тану туралы ғана болып отыр.

«Менің білуімше, бұл жағдайда АХҚО соты даудың мәнін қараған жоқ. Әңгіме тек Швейцарияда қабылданған арбитраж шешімін мойындау туралы болып отыр», — деді ол.

Сонымен қатар Даниель Ваисовтің айтуынша, Газпром бұл сот ұйғарымының күшін жою туралы өтініш беруге толық құқылы.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз