Қызылордадағы жаңа стадионы бар спорт мектебі жеке басқаруға беріледі
Компания пайданың 50%-ын жергілікті бюджетке беруге міндетті болады
Қызылордадағы Ғани Мұратбаев атындағы облыстық мамандандырылған олимпиадалық резервтің балалар мен жасөспірімдер мектебін сатып алу құқығысыз бес жылға сенімгерлік басқаруға беру жоспарлануда, деп хабарлайды Kapital.kz іскерлік ақпарат орталығының тілшісі.
e-qazyna.kz алаңындағы сауда-саттық 2026 жылғы 26 мамырда өтеді. Аукционға қатысушылар 772,3 млн теңге көлемінде кепілдік жарна төлеуі қажет.
«Сенімгерлік басқарушы мектептің жылдық таза пайдасының 50%-ын жергілікті бюджетке аударып отыруы тиіс. Сенімгерлік басқаруға сауда-саттықтың жалғыз қатысушысына беруге жол беріледі», - деп нақтыланады e-qazyna.kz сайтында.
Мектептің теңгерімінде ауданы 30,3 мың шаршы метр болатын 11 мың орындық стадион бар. Ол 2025 жылдың қазан айында салынған. Жаңа спорт кешені UEFA жіктелімі бойынша IV санатқа сәйкес келетіні хабарланған болатын.
Аукцион жеңімпазы мектеп базасында еурокубоктардың плей-офф іріктеу кезеңдерінен бастап, Қазақстан құрамасының жолдастық кездесулері мен жастар құрамасының матчтарына дейінгі футбол ойындарын өткізуге міндетті.
Сонымен қатар, басқарушы компания жыл сайын өз қаражаты есебінен ғимаратты жөндеп, мектеп аумағын абаттандыруы керек.
«Нысанды сатуға немесе оны кепілге қоюға жол берілмейді», - делінген құжатта.
Қазіргі уақытта мектеп Қызылорда облысының Дене шынықтыру, спорт және туризм басқармасына тиесілі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
