• Басты бет
• Технологиялар
• Қытайда роботтарды енгізу 2035 жылға қарай жұмыс күші тапшылығының 60%-ына дейін өтей алады

Қытайда роботтарды енгізу 2035 жылға қарай жұмыс күші тапшылығының 60%-ына дейін өтей алады

Мұндай болжамды Barclays Plc. сарапшылары жасап отыр.

Қытайда адамға ұқсас роботтарды енгізу 2035 жылға қарай елдегі болжамды жұмыс күші қысқаруының 60%-ына дейін өтей алады. Мұндай пікірді Barclays Plc. сарапшылары білдірді, деп жазады Интерфакс-Қазақстан.

Қазіргі демографиялық бағалаулар мен Қытайдағы экономикалық белсенді халық үлесі 65% деңгейінде сақталады деген болжамға сүйене отырып, банк сарапшылары алдағы он жылда елдегі әлеуетті жұмысшылар саны 37 млн адамға қысқаруы мүмкін деген қорытындыға келген.

Мұндай ауқымдағы қысқару, соның ішінде туу деңгейінің төмендеуі мен халықтың қартаюына байланысты, өндірістік сектордың дамуына кедергі келтіруі мүмкін. Ал бұл сектор ел экономикасының шамамен төрттен бір бөлігін құрайды.

Barclays зерттеуінде айтылғандай, еңбек өнімділігінің күтілетін өсімі жұмыс күші шығынының аз ғана бөлігін өтей алады. Бұл автоматтандыру мен роботтандыруды белсендірек енгізу қажеттігін күшейтеді.

Қытайдағы өндірістік кәсіпорындарға түсетін жүктеменің артуымен қатар, жұмысшылар санының азаюы «миллиондаған роботты қабылдай алатын ауқымды ішкі нарық қалыптастырады».

Банктің оптимистік сценарийіне сәйкес, 2035 жылға қарай Қытайда жұмыс істейтін антропоморфты роботтардың жалпы саны 24 млн бірлікке жуықтайды.

«Қазіргі онжылдық – роботтар онжылдығы және ол Қытайға тиесілі», – деп жазды Barclays сарапшылары.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз