Қазақстан Эбола безгегіне байланысты санитарлық бақылауды күшейтті
Африка елдеріне шығатын қазақстандықтарға сақтық шараларын сақтау ұсынылды
Қазақстанда Эбола безгегі таралған елдерден келетін адамдарға қатысты санитарлық-карантиндік бақылау күшейтілді. Мемлекеттік шекарадағы өткізу бекеттерінде қашықтан термометрия жүргізіліп, инфекцияның елге әкелінуінің алдын алу шаралары қолға алынуда, деп хабарлайды Kapital.kz іскерлік ақпарат орталығы Санитариялық-эпидемиологиялық бақылау комитетінің баспасөз қызметіне сілтеме жасап.
Эбола безгегі – негізінен Африка елдерінде кездесетін аса қауіпті вирустық ауру. Инфекция көзі ретінде ауру жануарлар мен науқас адамдар саналады. Вирус қан, биологиялық сұйықтықтар және ластанған заттар арқылы жұғады. Инкубациялық кезеңі 2 күннен 21 күнге дейін созылады. Негізгі белгілері – дене қызуының көтерілуі, әлсіздік, бас және бұлшықет ауруы, құсу, іш өту, бөртпе және қан кету.
Дүниежүзілік денсаулық сақтау ұйымы (ДДҰ) Конго Демократиялық Республикасы мен Угандадағы Эбола безгегінің өршуін халықаралық маңызы бар төтенше жағдай деп жариялады. Аурудың таралуына Bundibugyo штаммы себеп болған. Бұл вирус түріне қарсы әзірге әлемде вакцина да, арнайы емдеу тәсілі де жоқ.
ДДҰ мен CDC бағалауынша, Қазақстан мен Орталық Азия елдері үшін инфекцияның таралу қаупі төмен. Себебі өңірде індет тіркелген аймақтармен тікелей тұрақты әуе қатынасы жоқ.
Эндемиялық елдерге шығатын азаматтарға мынадай ұсыныстар берілді:
1. Эбола безгегі тіркелген Африка елдеріне, әсіресе балалармен бірге барудан бас тарту;
2. Жабайы жануарлармен (приматтар, жарқанаттар) және инфекциялық ауру белгілері бар адамдармен байланысқа түспеу;
3. Жабайы жануарлар сатылатын базарларға бармау, тек қауіпсіз су мен термиялық өңделген тағам тұтыну, жеке гигиена талаптарын сақтау;
4. Шетелден оралғаннан кейін 21 күн ішінде дене қызуы, бас ауруы, бөртпе, құсу немесе іш өту белгілері байқалса, дереу дәрігерге қаралып, шетелде болғаны туралы хабарлау.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
