Даниялық FLSmidth Қарағандыдағы сервистік орталыққа $15 млн инвестиция салады
Жоба тау-кен кәсіпорындарына қызмет көрсету инфрақұрылымын кеңейтуді көздейді
Даниялық инжинирингтік FLSmidth компаниясы Қарағандыдағы тау-кен өндіру кәсіпорындарына қызмет көрсететін сервистік орталық инфрақұрылымын кеңейтуге 15 млн доллар инвестиция салуды жоспарлап отыр. Бұл туралы Қазақстан Сыртқы істер министрлігі Инвестициялар комитетінің төрағасы Ғабидулла Оспанқұлов пен халықаралық компанияның бас атқарушы директоры Тони Лааксонен арасындағы кездесу барысында белгілі болды, деп хабарлайды Kapital.kz іскерлік ақпарат орталығы СІМ баспасөз қызметіне сілтеме жасап.
Келіссөздер барысында тау-кен және цемент өнеркәсібі саласындағы жетекші халықаралық инжинирингтік компаниялардың бірімен ынтымақтастықты одан әрі тереңдету перспективалары қаралды.
Тараптар сондай-ақ Қарағандыдағы сервистік орталықты кеңейту жобасын талқылады. Жоба Қазақстан мен Орталық Азиядағы тау-кен кәсіпорындарына қызмет көрсетуге арналған сервистік инфрақұрылымды жаңғыртуды және айтарлықтай ұлғайтуды көздейді. Инвестицияның жалпы көлемі шамамен 15 млн долларды құрайды.
Ғабидулла Оспанқұлов бұл жобаның жабдық жеткізуге, өндірісті жергіліктендіруге және заманауи технологияларды трансферттеуге бағытталған ұзақ мерзімді өнеркәсіптік әріптестіктің үлгісі ретінде қарастырылатынын атап өтті.
Тараптар сервистік орталықтың алдағы ашылуын талқылай отырып, оның қызмет түрлері кең болатынын жеткізді. Атап айтқанда, жабдық компоненттерін өндіру және қалпына келтіру, тау-кен техникасын жөндеу мен жаңғырту, тораптар мен агрегаттарды құрастыру және техникалық қызмет көрсету, сондай-ақ тау-кен металлургия кешені кәсіпорындарына инженерлік және техникалық қолдау көрсету жоспарланған.
Кездесу қорытындысы бойынша тараптар өзара тиімді серіктестікті дамыту мен диалогты жалғастыруға мүдделі екенін растады.
Еске салсақ, бұған дейін Nostrac Group инвесторы Ақтау теңіз портында қандай жұмыстар жүргізуді жоспарлап отырғаны хабарланған еді. Компания контейнерлік тасымалды дамытуға, инфрақұрылымды кеңейтуге және теңіз түбін тереңдетуге ниетті.
Сондай-ақ Dornan Engineering Group пен Ample Solutions Hong Kong Қазақстанда инвестиция көлемі 3 млрд долларға дейін жететін дата-орталық салуды жоспарлап отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
